İlk küznıñ 8

1920 s. Aqmescitte, Qırım, alim, tehnikiy ilimler doktorı,
professor, ŞSCB 1980 s. Devlet mukâfatınıñ laureatı
Refat APPAZOV (08.09.1920–18.04.2008) doğdı.

1946 s. başlap S. Korolövniñ reberligi altında Sovetler Birliginiñ kâinat programması boyunca OKB 1-de çalıştı. 1961–1988 ss. "Energiya" NBO-da ballistika bölüginiñ yolbaşçısı. İnsannıñ kâinatqa ilk uçmasını azırlav, ilk sovet alâqa yoldaşları, Ay, Venera ve Marsqa uçuv leyhaları, "Energiya-Buran" programması üzerinde çalıştı. 1987 s. qırımtatar milliy areketine qoşuldı. 1990–1991 ss. — V. Doguciyevniñ yolbaşçılığındaki Qırımtatar meseleleri Devlet komissiyasınıñ azası. II Qurultaynıñ teşebbüsçileri ve delegatlarından biri edi (1991). 1991–1995 ss. Meclis prezidiumınıñ azası edi. 2001 s. "Yürekteki ve hatırıdaki izler" adlı hatıra kitabını neşir ettirdi. Korolövda (RF) vefat etti. Vasiyetine köre, Qırımda defn etildi

1932 s. Koreizde, Qırım, qırımtatar milliy areketiniñ veteranı
Kemal KUKU (08.09.1932–27.06.2015) doğdı.

1944 s. quralaynıñ 18-inde Özbekistanğa sürgün etildi. 1956 senesinden başlap milliy arekette iştirak etti. 1976 s. Novorossiyskke köçti ve Kubanda teşebbüs gruppasınıñ yolbaşçısı oldı. 1987 senesi Moskvağa Kubandan yollanılğan 150 faalden biri oldı. 1990 s. Moskvada V.Doguciyevniñ yolbaşçılığında Qırımtatar meseleleri Devlet komissiyasınıñ azası. Qırımtatar milliy areketiniñ azalarınıñ Ukrayina ŞSC Yuqarı Şurasınıñ reisi L. Kravçuknen körüşüvde iştirak etti. 1989 s. Krasnodar ülkesinden Leninabad şeerinde (Tacikistan) olıp keçken Qırımtatar Milliy areketiniñ (QMA) bütünittifaq qurultayınıñ iştirakçisi. 1993 s. qorantasınen beraber Qırımnıñ Koreiz köyüne köçti. Cemaat erbabı, "Eren-Evliya" musulman cemiyetiniñ reisi, "Areket" gazetiniñ muarririyet azası. QMA-niñ iş teşebbüs gruppasınıñ faal iştirakçisi. Koreizde vefat etti.