İlk küznıñ 29

1927 s. Aqmescitte , Qırım, sovet devlet erbabı, tehnik ilimler namzeti
Server ÖMEROV (29.09.1927–22.09.2004) doğdı.

1944 s. quralayda Sverdlovsk vilâyetine sürgün etildi. Soñra Özbekistanğa köçip, aliy tasil aldı. 1964 senesinden başlap kolhozlar ve sovhozlar qurucılığı Devlet kooperativ komitetiniñ naziri. Soñra Özbekistan ŞSC-niñ qurucılıq naziri oldı. Özbekistan ŞSC-niñ Yuqarı Şurasınıñ deputatı. (IX-X çağıruvları) 1960–1970 ss. qırımtatar milliy areketine qoşuldı. 1975 s. ŞSCB-niñ reberligine qırımtatar milliy meselesini çezmek talabınen mektüp imzaladı. Vatanına qaytqan soñ S. Ömerov Qurultaynıñ ğayrıdan teşkil etilmesinde iştirak etti, teşkiliy komitetniñ reisi edi. Qırımtatar Milliy Qurultayınıñ delegatı (1991). 1991–1996 ss. Meclis azası, iqtisadiyat ve yatırımlar bölüginiñ reberi edi. 1995–2001 ss. Birleşken Milletler Teşkilâtınıñ Qırım inkişafı ve integratsiyası programması mesleatçısı olıp çalıştı. Aqmescitte öz dairesinde ömür arqadaşı Alime ile beraber hırsızlıq ücüminde elâk oldı.

2003 s. Rusiye Federatsiyası, Rusiyeniñ qıtaiy qısmına qoşmaq maqsadınen,
Taman yarımadasınıñ yalısından Tuzla ukrayin adasına bent qurmağa başladı.

2003 s. ilk küzünde Rusiye, Keriç boğazı ve Azaq deñizindeki sıñırnı belgilemek maqsadınen, Keriç boğazınıñ ortasında yerleşken Taman yarımadasınıñ yalısından Tuzla ukrayin adasına bent qurucılığını başlap, devletlerara zıddiyetni meydanğa ketirdi. Bu Ukraуina-Rusiye munasebetleri arasında buhranğa sebep oldı.
Orta küzniñ 23-nde, qurucılar Ukrayina sıñırcıları ile Rusiye qurucıları arasında 100 metr qalğan soñ, bentniñ qurucılığı toqtatıldı. Aynı şu ayda Ukrayina, Qırımdaki Çauda burnu yanında raketalarnen arbiy talimler keçirdi. Boş ayda Rusiye ve Ukrayina baş nazirleri bentniñ qurucılığını toqtatmağa añlaştılar.