İlk küznıñ 27
1660 s. Çudniv cenki olıp keçti.
Tahta ğetman Yeji-Sebastian Lubomirskiynıñ yolbaşçılığında Reç Pospolıta, Nur-ed-din Murad Geray yolbaşçılığında Qırım hanlığı ve ğetman İvan Vığovskiy yolbaşçılığında ukrayinlerniñ ittifaqdaş orduları boyar Vasıl Şeremetyev yolbaşçılığındaki Moskva çarlığınıñ ordularına qarşı çıqtılar. Uruş Çudniv şeeri (şimdiki Jıtomır vilâyeti) civarında olıp keçti. Rusiyelilerniñ maqsadı — Ukrayinanıñ sağ yalısınıñ bir qısmını zapt etmek edi. Uruş, Kıyiv, Pereyaslav, Çerniğivni terk etip, 300 biñ rublelik kontributsiya tölemege mecbur olğan moskovitlerge qarşı ittifaqdaşlarnıñ ğalebesi ile yekünlendi. Şeremetyevniñ özü ordusınıñ bir qısmı ile 20 yılğa qırımtatarlarğa esirlikke tüşti.
1929 s. Aqmescitte, Qırım, alim-biolog Rustem ÇALBAŞ (27.09.1929–06.05.2012) doğdı. ŞSCB Devlet mukâfatınıñ laureatı (1981).
1963 s. namzetlik dissertatsiyasını qorçalağan soñ, 1970 s. başlap, Bütünittifaq ilmiy-tedqiqat institutında çalıştı. Tedqiqatlarınıñ esas yönelişi çöl ve yarı çöl yaylalarını kiyik floralarından alınğan yem ösümlikleri ile zenginleştirüv tehnologiyalarınıñ ilmiy esaslarını işlep çıqaruv edi. 72 ilmiy maqalesi derc etildi. SSSR Nazirler Şurasınıñ İcat ve keşif işleri Komitetiniñ 7 ruhsetnamesine ve müelliflik şeadetnamesine nail oldı. SSSR Devlet mukâfatınıñ laureatı (1981). 1992 s. tarihiy vatanı Qırımğa qayttı. Aqmescitte vefat etti.
1954 s. Taşkentte, ÖzŞSCB, "Avdet" gazetiniñ baş muarriri,
V çağırış Qırım Muhtar Cumhuriyeti Yuqarı Şurasınıñ deputatı,
haber siyaseti ve cemaatçılıqnen bağ idaresiniñ reberi,
Qırımtatar Milliy Meclisiniñ prezidium azası Şevket QAYBULLAYEV doğdı.
1990 s. Aqmescitke köçti. 1989-1996 ss. — qırımtatar milliy areketiniñ merkeziy şurasınıñ halqara bölüginiñ müdiri, mesüliyetli kâtibi. 1991–1996 ss. — Aqmescit regional Meclisiniñ reisi. 1992 s. başlap Qırımtatar tarihı ve medeniyetini tedqiq etkenler cemiyetiniñ reisi, "Qasevet" tarihiy-etnografik mecmuasınıñ baş muarriri. 1999 s. başlap Qırımtatar Milliy Meclisiniñ cemaatçılıq, teşkilâtlar ve kütleviy haber vastaları ile alâqalar idaresiniñ reberi. 2006–2010 ss. — Qırım Muhtar Cumhuriyeti Yuqarı Şurasınıñ beşinci çağırılış deputatı. 2005 s. başlap "Avdet" gazetiniñ baş muarriridir. 2014 s. soñ gazet kütleviy haber vastası olaraq qayd etilmedi ve 999 nusha tirajınen çıqmağa devam ete.