İlk küznıñ 14
1912 s., Ğavr köyünde, Qırım, müendis, alim-neftçi,
şuralar neft sanayısınıñ teşkilâtçısı ve reberi, tehnik ilimler doktorı,
professor Asan ASAN-NURİ (14.09.1912–06.1978) doğdı.
1942–1957 ss. ŞSCB Neft sanayısı halq komissarlığınıñ baş apparatında çeşit vazifelerde çalıştı.
1944 s. qırımtatar halqınıñ İç işler halq komissarı L. Beriyanıñ ögünde neft sanayısı saasında ileri alimlerniñ imayesi sayesinde sürgün etilmedi. 1946 s. o diger müellifler ile «Qarada ve deñizde neft quyularını qazmaq içün qullelerniñ qurulışı ve tez quruv usullarını işlep çıqaruv içün» Stalin mukâfatınen taqdirlengen edi, 1949 s. Ise «Deñizde neft istisalcıları içün stakan usulını işlep çıqaruv içün» mukâfatlandı.
1947 s. alimler grupasınıñ erkânında İzberg şeeri (RŞSCB) civarında deñiz yatağında dünyada birinci estakadanı qurdı. 1960 s. ömrüniñ soñuna qadar Bütünittifaq qazma tehnologiyaları ilmiy-tahqiqat institutınıñ müdiri edi. 1968 s. başlap tehnikiy ilimler doktorı. 1972 s. ŞSCB Devlet mukâfatınen qıyın iqlim şaraitlerinde cermay qazma tehnologiyalarınıñ işlep çıqaruv içün taqdirlendi. Moskvada vefat etti.
1912 s. Köpürliköyde, Qırım, yazıcı, ressam,
cemaat erbabı Ennan ALİMOV (1912–1941) doğdı.
M.Samokişa adına Qırım ressamlıq oquv yurtunıñ birinci müdiri (1937–1941). 1933–1940 ss. onıñ "Alim izlerinen", "Qumru qanat kergende" povest ve ikâyeleri, "Tañ hayırlap", "Vatanım menim" şiirleri dünya yüzüni kördi. Ustanıñ resimleri sergilerde numayış etildi, "Qaytarma oynağan qız", "Ormanda tañ" ve diger eserleriniñ reproduktsiyaları "Yaş quvet" ve "Komsomolskaya pravda" gazetlerinde derc etildi. 1937 s. M. Samokişa adına Qırım ressamlıq oquv yurtunıñ birinci müdiri oldı. Ekinci cian cenkiniñ ilk künlerinden başlap E. Alimov cebege ketti. 1941 s. vefat etti. O, Ekinci cian cenki yıllarında cenkte elâk olğan on eki belli qırımtatar yazıcısından biridir.
1953 s. Mirzaçülde, ÖzŞSC, ressam Mecit REŞİTOV doğdı.
1993–2003 ss. onıñ resimleri Felemenk ve Almaniya galereyalarında numayış etildi. 2001 s. soñunda tarihiy vatanına qayttı. Anda Aqyar şeerinde yaşadı.
2002–2004 ss. Lviv milliy sanat akademiyasınıñ büyük ocası. 1985 s. başlap söyle sergilerniñ iştirakçisi: "Ressam künü" (Aqmescit, 2005), "Mayıs 18" (Aqmescit, 2006), "Doğğan yerge qaytuv" (Aqyar, 2007), "Qırım. Üçünci ölçev" (Kıyiv, 2021) ve ilâhre. Resimleri Özbekistan, Ukrayina, Almaniya, ABD sanat galereyalarınıñ kollektsiyalarında ve şahsiy toplamlarda saqlana.