Armannıñ 23

1382 s. Altın Ordu hanı Tohtamış Moskvanı qırşavğa aldı.

Moskvalı knâz Dmitro Donsköy Altın Orduğa bergi tölemekni red etkeni sebebinden, Tohtamış Moskvanı qamaçavğa aldı. Han Moskvağa kelgende, knâz şeerden qaçıp ketti. Üç kün içinde Tohtamış Moskvanı basıp aldı, öz askerlerine şeerni yağma yapmağa ve yaqmağa izin berdi. O zaman Moskvada yaşağan 40 biñ ealiden 25 biñi elâk oldı. Bu ğalebe Tohtamışqa Altın Ordunıñ bütün topraqlarında öz akimiyetini pekitmek içün esaslar yarattı.

2021 s., Kiyiv şeerinde Qırım platformasınıñ birinci sammiti keçti.

Bu tedbirde 47 devlet ve halqara teşkilâtlar iştirak ettiler. Delegatsiyalarınıñ başlıqları 15 ükümetniñ yolbaşçısı, 2 parlament spikeri, 14 ministr olğan edi. Bundan ğayrı, Avropa Birligi müessiselerniñ reberleri, Avropa Şurası ve GUAM baş kâtipleri, NATO Baş kâtibiniñ muavini iştirak ettiler. Tedbirniñ iştirakçileri Qırımnıñ işğalini takbih ettiler, yarımadanıñ barışıq yolunen qaytarılmasına qoltuttılar ve Qırımnı azat etilmesi boyunca deklaratsiyanı imzaladılar. Kiyivde Platformanıñ daimiy ofisini açtılar.

Ukrayina Devlet Bayrağınıñ künü.

Mezkür bayram, 23.08.2004 künü, Ukrayina Prezidenti Leonid Kuçma tarafından çıqarılğan qararınen umumdevlet seviyesinde teminlendi. Bayram qayd etilgende, er yıl, Kiyiv şeerinde ve Ukrayinanıñ başqa meskenlerde, ilim ve medeniyet erbapları, halqara, cemiyet, diniy teşkilâtlar ve siyasiy fırqalar vekilleriniñ iştiragınen bayraq tiklenmesiniñ resmiy tedbirler keçirile.