Oraqnıñ 7

1659 s. Konotop uruşı yüz berdi.

1659 s. zemaneviy Ukraina toprağıina moskovalılar ordusı kirdi. Çeçek ayında moskovalılar Konotop (şimdi Sumı vilâyetiniñ terkibinde) şeerine kelip çıqtılar. Şeerniñ eki ay devamında qırşavda oluvı getman İvan Vıgovskoyğa azırlanmaq içün imkânlar yarattı. Onıñ reberliginde 16-17 biñ kozak, 5 biñ poloniyalı ve 1,5 biñge yaqın kiralı askerler bar edi. Ordunıñ negizini qırımtatarlar — IV Muhammed Geraynıñ yolbaşçılığında 30 biñge yaqın asker — teşkil ete ediler. Getman Vıgovskiyniñ birleşken kozak orduları Şapovalovka köyü yanında moskova ordusınıñ ileri taqımlarını yoq etip, Konotopqa yaqınlaştılar ve, boyarin Trubetsköy başçılığındaki 120 biñlik moskova ordusını tar-mar ettiler. Çeşit menbalarğa köre, Konotop savaşında 30 biñden 60 biñgece moskovalılar can berdi. Knyâz Pojarskiy, knyâz Lvov, ağaqardaş Buturlinler ve başqalar esir alındılar.

1989 s. "Qırım" gazetanıñ birinci sanı çıqtı —
qırımtatar tilinde esas mustaqil basma neşirlerden biri.

Bu, qırımtatarlar Vatanğa qaytqan soñ, Qırımda çıqıp başlağan birinci gazetadır. Başta "Dostluq" dep adlandırılıp, ükümet gazetasına ilâve olıp, soñra mustaqillik qazandı ve şimdiki "Qırım" adını aldı. Bütün ömür devamında gazeta aftada birden üçkece sıq-sıq çıqa edi.
2005 s. başlap gazeta ayda bir kere "Qırımqaraylar" ilâvesinen çıqa. "Qırım" qırımtatar ayatınıñ çeşit saalarını, siyasetini, medeniyetini, edebiyatını aks ete, bala saifesi de bar. "Qırım" Rusiye akimiyeti nezareti altında olmağan ve taqiplerge oğrağan az sayılı matbuat vastalarından biri olaraq qalmaqta. Bugün ana tilini saqlap qalıp, inkişaf etip ve qırımtatarlarnıñ aq-uquqlarını qorçalap üzerinde çalışqan qırımtatar tilinde aftalıq neşirdir. Gazetanıñ baş muarriri Bekir Mamutov.