Oraqnıñ 28

1935 s., Qırımda, Ayserez köyünde, qırımtatar milliy areket iştrirakçisi
Ferat ÜSEYİNOV (28.07.1935–08.10.2011) dünyağa keldi.

1944 s. Özbekistanğa sürgün olundı. 1964 s. başlap, qırımtatarlarnı Qırımğa qaytaruv milliy areketine qoşuldı. Teşebbüsçiler gruppalarınıñ körüşüvlerinde iştirak etti ve Moskvağa, qırımtatar temsilcileri sırasında barğan edi. 1968 s. Qırımğa qayttı, ve ğayrıdan Özbekistanğa sürgün etildi. Bir qaç kere daa Qırımda yerleşmege ıntıldı, lâkin olamadı, Askaniya Nova qasabasında qalmağa mecbur oldı. Bu yerde ise o milliy areketi ştabını teşkil etti ve Qırımda qırımtatarlar taqip olunğanları aqqında Özbekistanğa malümatlar yetkize edi.
1987 s. Moskvadaki Qızıl meydanda ötkerilgen mitingde iştirak etti. Qırımğa qorantası taqım 1995 s., niayet, avdet oldı. Aqmescitte, 2011 s., orta küz ayı 11 künü, vefat etti.

1960 s. Özbekistan SSR-niñ Bekabad şeerinde, folkloristçalğıcı,
bestekâr, pedagog Cemil Karikov doğdı.
Hor ve simfonik orkestr içün qırımtatar milliy gimni arancirovkasınıñ müellifi,
Ukrainada nam qazanğan sanat erbabı (2015).

Simfonik ve kamera orkestri içün yazılğan eserlerniñ müellifi. Yedi dane muzıkalı albom azırladı. Qırımtatar akademik muzıkalı-drama teatriniñ "Alim", "Antikvar tükâni", "Aynenni" adlı spektaklleri içün muzıka yazdı. "Qaytarma" ansambliniñ muzıka reberi, "Qırım" DTR Komitetinde muzıka muarriri, Qırımtatar teatri orkestriniñ baş dirijörı olıp çalıştı. 2004 s. başlap, "Maqam" adlı qırımtatar an’aneviy muzıkası ansambliniñ tesisçisi ve yolbaşçısı. Hanlıq deviri muzıkasını ve bir sıra milliy muzıka aletlerini ğayrıdan ayatqa qaytardı. C. Karikov Ukraina, Türkiye, Almaniya, Poloniyada qırımtatar muzıka sanatını çoq kereler numayış etti.