Oraqnıñ 1

1935 s., Qırımda, Uskutte, cemaat erbabı, qırımtatar milliy areket veteranı
Veciye KAŞKA (01.07.1935–23.11.2017) dünyağa keldi.

1944 s. quralay 18 künü Özbekistanğa sürgün etildi. Öz qocası Bekirnen, 1950 ss. milliy areketke qoşuldı. Olarnıñ qorantası Vatanğa üç kere avdet olmağa tırıştı, lâkin, er bir sefer olarnı pasport rejimi bozuluvında qabaatlap, aman ğayrıdan sürgün ete ediler. Tek A. Saharov bu işke kirişkenden soñra, qorantanı Uçköz köyünde qayd ettiler.
1989 s. V. Kaşkanıñ evinde bütün Sovet Birliginden kelgen qırımtatar milliy areketiniñ teşebbüsçi gruppalar azalarınıñ toplaşuvları ötkerile edi. 1990 ss. başında Veciye Kaşka Qırımğa avdet olğan vatandaşlarına faal tarzda yardım etken edi. Rusiye Qırımnı işğal etkenden soñra, qırımtatar aququqları içün küreşini devam etti.
2017 s. boş ay 23 künü Rusiye hızmetçi küçler hadimleri Bekir Degirmenci, Asan Çapuh, Ruslan Trubaç, Kâzim Ametov ve Veciye Kaşkadan ibaret faaller gruppasını yaqaladı. Yaqalav tedbiri yüz bergende, 82 yaşındaki Veciye Kaşkağa qarşı zulumlıq kösterildi, şunıñ neticesinde qadın, acele yardım maşinasında olğanda, vefat etti.

1969 s. Taşkent seer mahkemesinde "Onlar protsessi" ya da "Taşkent protsessi"
adınen tarihke kirgen mahkeme toplaşuvları başlandı.

On qırımtatar uquqqoruyıcısı: Reşat Bayramov, Rollan Kadıyev, Ayder Bariyev, İzzet Hayırov, Ridvan Ğafarov, İsmail Yazıcıyev, Svetlana Ametova, Münire Halilova, Riza Ümerov, Ruslan Eminovnı "qırımtatar meselesiniñ qozğavı ve faal tarzda ayatqa keçirüvi"nde qabaatlağan ediler. Özbekistan SSRniñ Yuqarı Mahkemesi episini suçlu, dep esapladı ve türlü müddetlerge — altı aydan başlap, üç yılğace — mahküm etti.