İlk yaznıñ 3

1571 s. Qırım hanı Devlet Geraynıñ Moskvağa seferi.

1473 s. III İvan Bibliya qarşısında Qırım Geraylarına sadıq olacağına ant etti. Şu yemin Moskva padişalığına 1476 seneden Volga ordusına er yıllıq bergini ödememek içün imkân yaratqan edi. Amma 8 yıldan, şarqta bir qaç muvafaqiyetli topraqlarnıñ işğalleri neticesinde, moskvalılar Qırımğa aqça ödemekten vazgeçeler. Onıñ yerine Qırım hanlığınıñ topraqlarına ücüm etip, ğarbiy ve şarqiy Qırımnıñ köy ve şeerlerini yaqtılar, bir çoq qırımtatar öldürildi. IV İvannı cezalamaq içün, 1571 s., baârde Qırım hanı Devlet Geray 120 biñ askernen Moskvanı sarıp aldı. Moskva knâzi İvan Groznıy şeerden qaçtı. Qırım hanı IV İvannı beklemekten yorulğan soñ, Moskva etraflarını yaqmağa emir etti. Yılnameler haber ete ki, o künü yüz bergen küçlü yelniñ neticesinde, ateş pek tez ağaçtan qurulğan şeerge keçe ve bir qaç saat içinde onı kül obasına çevire.