İlk yaznıñ 21

1908 s., Qırımda, Kezlev şeerinde şair, terciman,
zemaneviy qırımtatar şiiriyetiniñ temelini qoyğanlardan biri
Eşref ŞEMİ-ZADE (21.06.1908–11.03.1978) dünyağa keldi.
Stalin rejiminiñ qurbanı.

SSSR Yazıcılar Birliginiñ azası (1928), Sovet yazıcıları Birinci syezdiniñ delegatı (1934). "Dneprelstan" (1930) poeması içün adı Büyük Sovet Entsiklopediyasına kirsetilgen (1931). Eki kere repressiyağa oğradı: 1937 ve 1949 seneleri. 1944 s. birinci kere apstan, İrkutsktan qaytqanınen bütün halq ile sürgünlikke oğray. Ekinci sefer 1949 s. yaqalanıp, 25 yılğa mahküm etile, 1955 s. azat olundı.
İcadında ayırı yerni lirik-epik "Közyaş divar" (1959) poeması tuta, eser "qırımtatar tiliniñ entsiklopediyası" olaraq tanıldı. O, ilk olaraq XVII asırnıñ meşur şairi — Aşıq Ümerniñ ayatı ve icadı aqqında malümat toplap, neşir ete. V.Şekspir, T.Şevçenko, A.Mіtskeviç, Nizami, M.Servantes, O.Hayyam ve digerleriniñ eserlerini qırımtatar tiline tercime etti. Moskvada vefat etti. Aqmescitte defn olundı.

1960 s., Özbekistanda, Almazar köyünde grafika ressamı
Ramiz NETOVKİN (21.06.1960–16.07.2011) dünyağa keldi.
Ukrayina Ressamları Milliy Birliginiñ azası (1989).

1975 s. Qırımğa avdet ola. İcadınıñ esas dairesi — kitap ve stanok grafikası. 1991 s. Ukrayina ve çetel memeleketlerde sergileri ötkerile edi. "Qarasuvbazarnıñ keçmişini, zemanesini ve kelecegini aks etken eñ yahşı eser" kategoriyasında "Qarasuvnıñ dört köşesi" eseri içün Bekir Çoban-zade adında mukâfatınıñ saibi oldı. Bazı eserleri Aqmescit bediiy müzeyinde, Qırımtatar sanatı müzeyinde (Aqmescit) ve şahsiy kollektsiyalarda saqlanıp turmaqta. Turkiye, Antaliyada vefat etti. Qırımda, Qarasuv şeerinde defn etildi.