İlk yaznıñ 20

1920 s., Qırımda, Körbekül köyünde teatr aktrissası,
Özbekistanda qırımtatar tilinde ilk radio diktorı
Fatma AMETOVA (20.06.1920–30.03.2008) doğdı.

Qırımtatar devlet drama teatrnıñ aktrissası (1936–1938). 1938 s. Qırım radiosı canlı efirinde diktor olaraq çalışıp başladı.
1944 s. qural ayınıñ 18 künü Dilâra qızınen Özbekistanğa sürgün etildi. 1957 s. ÖzSSR qırımtatar tilinde ilk radio diktorı oldı. 30 yıldan ziyade radio ve televideniye meseleleri boyunca özbek Devlet komitetinde çalıştı. 1994 s. aile Qırımğa qayttı. Aqmescitte vefat etti.

1941 s., Qırımda, Avcıköyde ressam ve grafika ressamı
Alim ÜSEİNOV dünyağa keldi.

SSSR ve Ukrayina ressamlar Birliginiñ azası. ІІІ Halqara Qırım kamera akvareli biyenalesini Gran-Pri mukâfatına nail oldı (2003). Belli eserleri: "Vostoçnıy gorod" (Şarq şeeri) (2012), "Zakat solntsa v gorah" ("Dağlarda küneş qonması") (1989); "Krik" ("Feryat") (2015); "S nadejdoyu" ("Ümütle") (2014); "Slepıye" ("Soqurlar") (2015). Ressamnıñ eserleri Qırım müzeyleriniñ toplamlarında ve Ukrayina, AQŞ, Yaponiya, Özbekistan, Poloniya ve Turkiyeniñ şahsiy kollektsiyalarında bulunmaqta. Qırımda yaşay.

1987 s. — qırımtatarlarnıñ Moskvada narazılıq aktsiyalarınıñ başlanuvı.

1987 s. yazda, Qırım tamır halqınıñ aq-uquqlarını tiklemek talabı ile Mihail Gorbaçovnıñ adına yollanılğan mektüpke cevap alınmağan soñ, bir buçuq biñden ziyade qırımtatar Moskvağa kelip çıqtı ve mında bir sıra halq ögünde aktsiyalarnı keçirdi ve Moskva uquq qorçalayıcıları em de akimiyet temsilcileri ile körüşti. Hususan, oraq ayınıñ 6-nda 120-ge yaqın faalciler, başta Qızıl meydanda, soñ ise KPSS MK binası yanında numayış keçirdiler. Ellerinde "Halqımıznı Vatanına qaytarıñız", "Qırımtatarlarnıñ aqlarını tikleñiz", "Demokratiya ve aşkârlıq — qırımtatarlar içün de" metinli plakatlarnı tuta ediler.