İlk yaznıñ 15

1502 s., Qırım hanı Mengli Geray Şeyh-Ahmed han ile muarebede ğalebe qazandı.

Şeyh-Ahmed han, özüni Qırım hanı Mengli Gerayğa qarşı koyıp, kendini Büyük Ordunıñ soñki hanı olaraq ilân etti. Buña cevaplanaraq, Mengli Geray han arbiy seferge çıqıp, Sula özeni Dneprnen qavuşqan yerde Şeyh-Ahmedni yeñdi. Ordunıñ topraqları boyu keçip, şeerlerge toqunmayıp, raqipni darma-dağın etti ve seferini paytahtta – Sarayda yekünledi. Şu zamandan Qırım hanlığı resmen Çingisidler padişalığı topraqlarınıñ mirasçısı oldı, Qırımnıñ Qırq-Yer şeeri ise paytaht statusını elde etti. Şu muarebe ile Mengli Geray Ordudaki iddiacılar arasındaki akimiyet içün küreşni ebediyen toqtattı.

1937 s. Qırımda, Aqmescit şeerinde cemaat erbabı, milliy areketniñ iştirakçısı, nevropatolog,
Qırım MC Yuqarı Şurası II çağıruvınıñ deputatı Fuat ABLÂMİTOV (15.06.1937–11.2007) doğdı.

Qırımtatar milliy areketi liderlerinden biri (1980–1990 ss.). Miting, toplaşuvlar, vesiqa ve informatsion kâğıtlarnı azırlav teşkilâtçısı. 1987 s. oraq ayınıñ 7-nde qırımtatar faâlleri Reşat Cemilev ve Sabriye Seutovanen birlikte Moskva uquq qorçalayıcılar tarafından teşkil etilgen "Glasnost" presklubınıñ açılmasında iştirâk etip, çetel KİV vekillerine oraq ayınıñ 6-nda ötkerilgen qırımtatarlarnıñ numayışı aqqında haber ettiler. Şu numayışnıñ teşkilâtçılarından biri F.Ablâmitov edi. Tibbiyet ilimleri namzeti (1973). Aqmescitte vefat etti.

1956 s., RSFSR, Perm vilâyetiniñ Gej köyünde
manzaralı sanat ressamı Mustafa ALİYEV dünyağa keldi.

2002 s. Özbekistan Cumhuriyeti bediy Akademiyası yanındaki Özbekistan ressamlar İcadiy birleşmesiniñ azası. 2007 s. qırımtatar ressamları Aqmescit assotsiatsiyasınıñ azası. Belli eserleri: "Proşloye i nastoyaşçeye: Meçet-medrese, Han Uzbek" ("Keçmiş ve şimdiki zaman: Mescit-medrese, Han Uzbek") (2014); "Minaret Hanskogo dvortsa" ("Han Saraynıñ minaresi") (2012). Eserleri Özbekistan, Ukrayina, RFniñ bediiy galereyalarında ve şahsiy kollektsiyalarda saqlanıp turmaqta. Ressam Qırımda yaşay.