Quralaynıñ 9

1909 s. Qırımda, Bağçasaray şeerinde kinorejissyör-yılnameci,
yazıcı Emir FAİQ (09.05.1909–03.02.1993) doğdı.

VGİK-ni bitirgen soñ Taşkentte kinohronikal filmler studiyasında "Sovet Özbekistanı" adınen belli olğan 25 kinocurnal yarattı. Ekinci cian cenki başlanğanda göñülli olaraq cebege ketti, adiy askerlikten kapitanğa qadar yol keçti. Cebe kinogruppası terkibinde arbiy kinohronikalarnı çıqardı. 1946–1990 ss. Alma-Atada Qazaqfilm kinostudiyasında "Qanatlı bahşış", "Bir kere gecesi", "Oğlum menim!", "Qalbiñden sora" bediiy filmlerni ve 200-den ziyade vesiqalı, ilmiy-kütleviy filmlerni çıqardı. Emir Faiq "Men sizni unutmadım" (1974), "Bir tamçı suv" (1980), "Borandan soñ" (1984) kibi ikayeler ve povestler cıyıntığınıñ müellifi. Qazaqıstanda nam qazanğan sanat erbabı (1959), Kinematografçılar birliginiñ azası. Alma-Atada vefat etti.

1918 s. Qırımda, Küçük Özen köyünde oyuncı, baletmeyster, halq horeografı,
Ukrayinada nam qazanğan sanat erbabı Akim CEMİLEV (09.05.1918–11.12.2001) doğdı.

Ekinci cian cenki iştirakçisi. 1945 s. ilk küz ayınıñ 18-inde Pragadaki altı saatlı rezonanslı "Ğalebe kontserti"niñ baletmeyster-sanalaştırıcısı ve solisti. 1946 s. demobilizatsiyadan soñ öz qorantasını Özbekistanda taptı. 1957 s. "Qaytarma" qırımtatar ansambline davet etildi. 1982 senesinden ansamblniñ baletmeysteri olıp çalıştı. 1989–1993 ss. — Qırımtatar muzıkalı-drama teatriniñ baletmeysteri. Aqmescitte vefat etti.

1918 s. Qırımnıñ Saraylı-Qiyat köyünde yırcı, "Qaytarma" ansanbliniñ solisti
Zeynep LÜMANOVA (09.05.1918–22.10.1992) doğdı.

1933 s. Qırımtatar radiokomiteti efirinde çalışmağa başladı. Ekinci cian cenki devrinde arbiy qısımlarda ve gospitallerde yırladı.
1944 s. Özbekistanğa sürgün etildi. Sanağa 1972 s. "Qaytarma" ansambliniñ solisti olıp qayttı ve 1976 s. qadar çalıştı. Yırcı "Mavilem", "Aqız, seniñ ne qazalı, ne belâlı başıñ bar", "Em seversiñ, em sevmezsiñ" kibi bir sıra halq yırlarını saqlap, ğayrıdan canlandırdı. Taşkentte vefat etti.