Quralaynıñ 31

1475 s. Kefeniñ qamaçavı başlandı.

Ulu vezir ve qapudan-paşa Gedik Ahmed komandanlğı altındaki Osmanlı flotu Kefeni — Qırımdaki ve Qaradeñiz yalısındaki ceneviz faktoriyalarınıñ baş şeerini qamaçavğa almağa başladı. Kefe bir aftadan soñ teslim oldı, yılnıñ soñunda ise Qırımnıñ bütün ceneviz ve got mülkleri Mehmed Fatih sultannıñ akimiyetine keçti. Gedik Ahmed ilk qış ayında beş ay devam etken qamaçavdan soñ büyük telâflarnen Manğup şeerini elge kiritti. Bundan soñ Kafa öz adını Kefege deñiştirdi.

1997 s. Kiyevde Ukrayina ve Rusiye arasında dostluq aqqındaki Añlaşma imzalandı.

Añlaşma strategik ortaqlıqnı, mevcut sıñırlarnıñ bozulmamasını tanuvnı, topraq bütünligine sayğı köstermekni (Qırımnıñ Ukrayina toprağı olğanı ayrıca qayd etilgen edi) ve öz toprağını diger tarafnıñ hafsızlığına zarar ketirmek içün qullanmamaq aqqındaki özara mecburiyetlerni qaviyleştirdi. Bu añlaşma USSR ve RSFSR arasında 1990 s. Yapılğan evelki añlaşmanı lâgu etti. Añlaşma öz küçüni 2019 s. çiçek ayınıñ 1-inde toqtattı.