Quralaynıñ 30

1879 s. Qırımda, Çuqurça köyünde ressam ve oca
Abdurefiy ABİYEV (30.05.1879–1938) doğdı. Stalin terrorınıñ qurbanı.

1917 s. Petrograd sanat abidelerini qorçalav ve saqlav cemiyetiniñ Bağçasaray bölügine reberlik yaptı. 1917 s. boş ayında U.Bodanınskiyniñ yardımınen Bağçasaraydaki "Sanayı-nefise-iüner mektebi"niñ direktorı vazifesinde çalıştı. 1928 s. milletçilikde qabaatlandı. 1929 s. Türkmenistan SSR-niñ Çarcuy ş. sürgün etildi. 1930 s. Qırımğa qayttı ve mekteplerde ocalıq yaptı.1938 s. yaqalandı ve qurşun cezasına üküm etildi.

1928 s. Qırımda, Barın köyünde yazıcı, şair, cemaat erbabı, edebiyatşınas,
qırımtatar fölklorını yahşı bilgen insanlarımızdan biri —
Riza FAZIL (30.05.1928–26.11.2016) dünyağa keldi.

1944 s. Qırımdan sürgün etildi. 1965 s. Taşkentte yaşap, "Lenin bayrağı" gazetasında çalışa. 1980–1992 ss. "Yıldız" jurnalında şiiriyet bölüginiñ müdiri. Özbekstanda nam qazanğan medeniyet hadimi (1989), SSSR Yazıcılar Birliginiñ azası (1975).
1970 s. Onıñ "Navrez" serlevalı birinci şiirler cıyıntığı basıldı. 1971 s. "Qayda birlik — anda tirilik" qırımtatar atalar sözleri kitabı çıqtı. Mektepler içün bir sıra dersliklerniñ, oçerkler cıyıntığınıñ, qırımtatar şiiriyetiniñ klassigi — Aşıq Ümerniñ 2 cıltlıq neşriniñ tertip eticisi. 1992 s. Qırımğa avdet ola. XII–XIII as. qırımtatar edebiyatınıñ tarihını ögrene, ana tiline Qurannı tercime ete, S. Nagayevnen müellifdeşlikte "Qırımtatar edebiyatınıñ tarihı. Qısqa bir nazar" kitabını bastıra.
1991 s. o II Qurultaynıñ delegatı oldı, ve Qırımtatar halqı Meclisiniñ azası olıp saylandı. Aqmescit şeerinde bu dünyanı terk etti.