Quralaynıñ 27

1637 s. Bahadır GERAY Qırım hanı etip saylandı (1600–1640).

O, kölemli ceñklerden vazgeçti. Qırım hanlığınıñ iqtisadiyatını küçlendirdi. Öz qolu altındakilerge daa çoq aq ve serbestlik berdi. Alımlarnı eksiltti. İdare qurumını islâh etti ve kenişletti, devlet ve halq hızmetini eyileştirdi. Reç Pospolitaya qıralı Vladislavnen diplomatik munasebetler qurdı. Lâkin tarihta o, şair Rezmiy — tasavvuf temsilinen belli olğan zengin edebiy variyetniñ müellifi olaraq daa çoq iz qaldırdı.

1920 s. qırımtatar vekilleriniñ syezdi öz işini başladı.

Onıñ maqsadı — Qırım yarımadasınıñ özözüni idare etüv şartlarını işlep çıqmaq, vaquflar (mal-mülk, eñ evvelâ topraq) ve milliy tasil meselesini çezmekten ibaret edi. Syezdniñ işi kelecek öz-özüni idare etüv apparatına saylavlar boyunca Müsülman şurasını teşkil etüvnen ve milliy medeniyetni inkişaf ettirüv aqqındaki qararnen yekünlendi. Syezdge Rusiyeniñ cenübindeki Silalı küçler baş komandanı baron Pyotr Brangel qol tuttı.

1965 s. ÖzSSR-niñ Bekabad şeerinde milliy areket vekili
Süleyman QADIROV doğdı.

2014 s. Qırımnıñ Rusiye anneksiyasından soñ Qadırov vatandaşlarına çeşit problemalı meselelerde adliyeviy yardım ve konsultatsiyalar berdi. O, Qırımtatar halqınıñ aqlarını qorçalav boyunca komitetniñ koordinatorlarından biri oldı.
2016 s. orta küz ayınıñ ortalarında Süleyman Qadırovğa qarşı cinaiy iş açıldı. O, "Rusiye Federatsiyasınıñ territorial bütünligini bozmağa çağırğan areketleri içün" qabaatlandı ve 2 senege şartlı cezağa üküm etildi.