Quralaynıñ 26

1648 s. Korsun (şimdiki Çerkas vilâyetindeki şeer) civarında cenk olıp keçti.

Quralay ayınıñ 16-sında Sarı Suv civarındaki mağlübiyetten soñ, getman Bogdan Hmelnitskiyniñ kazak ordusı serasker Toğay bey başçılığındaki qırımtatar ordusınen beraber getman Nikolay Pototskiyniñ polonya ordusına tuzaq qurdılar ve oña sarsıtıcı darbe berdiler. 4 saat içinde polnya ordusı tolusınen tar-mar etildi. Askerlerniñ ekseriyeti cenkte elâk oldı, qalğanlarını ise komandanınen beraber esirge alındı. 20 biñlik polonya ordusından tek 1,5 biñ adam sağ qaldı.

1898 s. Qırımnıñ Teberti köyünde Qırımtatar devlet drama teatrınıñ ilk aktörlarından biri
Emir-Amet PARІKOV (26.05.1898–15.02.1936) doğdı.

Bağçasaray bediiy zenaat tehnikumını bitirdi. Tarihçı, ressam ve sanatşınas Useyin Bodaninskiyden ders aldı. 1923 s. Aqmescitte Qırımtatar devlet drama teatrı açıla. 1925 s. onı teatrge işke davet eteler. Emir-Amet Parikov seyircilerniñ sevimli aktörı ola. O, Nizamiyniñ "Leyla ve Mecnun"ında — Naufal; U. İpçiniñ "Faişe"sinde — molla; A. Şirvan-zadeniñ "Namus"ında — Айрапет kibi komediya ve drama obrazlarını yarattı. Parikov icadınıñ eñ yüksek noqtası — Don-Kihot obrazını yaratması oldı. Aqmescitte vefat etti.

1916 s. Osmanlı imperiyasında, İstanbul ş. Tamırları Qırımlı olğan türk tarihçısı,
ilim doktorı, Osmanlı imperiyası tarihınıñ mütehassısı
Halil İNALCİK (26.05.1916–25.07.2016) doğdı.

1952 s. "Viyana Bozgun Yıllarında Osmanlı-Kırım Hanlığı İşbirliği" dissertatsiyasını qorçalap, professor unvanını qazandı. Onıñ eserleri, şu cümleden "Osmanlı imperiyası, klassik devri 1300-1600" ("The Ottoman Empire The Classical Age 1300-1600", 1973) kitabı balqan ve arap tillerine tercime etildi. Çoq universitetlerniñ fahriy doktorı derecelerinen mükâfatlandı. ХХ asırnıñ soñunda Kembricdeki halqara biografiya merkezi onı içtimaiy ilimler saasında dünyanıñ 2000 eñ yahşı alimleri sırasına qoştı. H.İnalcik Avraasiya Akademiyasını teşkil etkenlerden biri edi. Anqarada vefat etti, Fatih camisi mezarlığında defin etildi.