Quralaynıñ 24

1928 s. Qırımda, Aluşta şeerinde ressam ve oca, ÖzSSR-de nam qazanğan sanat erbabı
Kâzim EMİNOV (24.05.1928–01.05.1976) doğdı. SSSR Ressamları birliginiñ azası.

1944 s. quralay ayınıñ 18-inde Özbekistanğa sürgün etildi. Türkistandaki inqilâbiy vaqialarğa bağışlanğan abide resimleriniñ, Şarq şairleri ve alimleri portetleriniñ, peyzajlarnıñ müellifi. Ayrı işleri Özbekistan Devlet muzeylerinde, Ukrayina, Özbekistan, RF-nıñ bediiy galereyalarında ve hususiy kollektsiyalarda saqlanmaqta. İcadınıñ soñki devrinde Qırım peyzajı seriyalarını yarattı (1970–1976). Avtomobil qazası neticesinde elâk oldı, Taşkentte defin etildi.

1940 s. Qırımda, Mishor k. Milliy areket iştirakçisi
Eldar ŞABANOV (24.05.1940–17.01.2020) doğdı.

1944 s. Quralay ayınıñ 18-inde Orta Asiyağa sürgün etildi. 1960 ss. milliy areketke qoşuldı. Qırımtatarlar içinde birinciler sırasında vatanğa — Qırımğa qaytmağa nail oldı. 1969 ve 1970 ss. onı eki kere yaqalaylar. Eldar Şabanov 1989 s. Qırımda temelli yerleşti. 1991 s. II Qurultayğa vekil saylandı. Qarasuvbazarda vefat etti.

2016 s. Bağçasarayda qırımtatar faali, Bütün Dünya Qırımtatar Kongressiniñ İcra şurası ve regional Meclis azası Ervin İbragimov zorbalıqnen ğayıp etilgen edi.

Rusiye yol areketi havfsızılığı idaresi urbasına kiyingen belli olmağan şahıslar E.İbragimovnı yaqalap, onı beligisiz yerge alıp ketti. Aqrabalarınıñ ve taqiqatçılarnıñ qolunda ğayıp eticilerniñ ve olarnıñ arabasınıñ videosı olğanına baqmadan, işğalci akimiyet semereli şekilde taqiqat alıp barmadı, keççe ise onı tamamınen toqtatqan edi. Ervin İbragimov — Qırım yarımadasınıñ işğal etilmesinden başlap bu küngece zorbalıqnen ğayıp etilgen onlarnen qırımtatar qurbanlarından biridir. Onıñ taqdiri alâ daa belgisizdir.