Quralaynıñ 15

1655 s. Stokgolmge, İsveç qıralına Qırım hanından elçiler keldi.

Elçilerge Qırımlı diplomat Adilşah mırza reberlik yaptı. Onı han qadınınıñ şahsiy kâtibi Ali ağa, Murtaza ağa, Hasan ağa ve baş., cemi olıp 17 resmiy şahıslar ozğarıp keldiler. Ziyaretniñ maqsadı İsveç ükümetine IV Muhammed Geray Sofunıñ han etip saylanğanını bildirmek ve Karl V Gustavnı tahtqa oturğanı içün tebriklemek edi. Geray han küçlü arbiy flot saibi olğan İsveçni Moskvağa qarşı koalitsiyağa celp etmege istegen edi (koalitsiyanıñ şekillenmesinde Qırım hanı faal iştirak etken edi).

1957 s. ÖzSSR-niñ Cenübiy Alamışıq qasabasında balet artisti, baletmeyster, kino aktöri,
Ukrayinada nam qazanğan artist (1998) Munir ABLAYEV doğdı.

"Qaytarma" (1976), "Qırım" (1991) ansamblleriniñ balet artisti. "Ağır ava ve qaytarma", "Buvdan qaytarması" (zemaneviy qırımtatar tilinde manası belli olmağan qadimiy adı), "Qırım eskizleri", "Çoban oyunı" ve başqa oyunlarnı sanalaştırdı. Özüniñ professional faaliyeti devamında Özbekistan, Tatarıstan, Aqrusiye devlet oyun ansambllerinde oyunlarnı sanalaştırdı. Şeer, cumhuriyet konkurslarınıñ laureatı. Halqara konkurslarnıñ iştirakçisi olğan "Тeselli" bala ansambl-studiyasını teşkil etti.

2014 s. İşğalci RF ükümeti Qırımda tınç toplaşuv ve mitingler ötkerüvni yasaqladı.

Qırımtatar halqınıñ hatıra künü olğan quralay ayınıñ 18-ine eki kün qalğanda — qanunsız tarzda Qırım ükümetiniñ başına keçkenler "Ukrayinanıñ cenüb-i şarqında olıp keçken vaqialar sebebinden kütleviy tedbirlerni ötkermekni sıñırlamaq aqqında" emir çıqardılar. Bu emirge köre yarım adada kütleviy tedbirler ötkermekni sıñırlav müddeti 2014 s. ilk yaz ayınıñ 6-sına qadar devam etmesi közde tutulğan edi. Buña baqmadan qırımtatarlar 2014 s. quralay ayınıñ 18-inde Aqmescit ş. Aq-Meçet qasabasında cami qarşısındaki meydanda toplanmağa qarar berdiler.