Quralaynıñ 14

2015 s. "Simferopol" halqara ava alanına yañı ad berildi:
Amethan Sultan adına "Simferopol" halqara ava alanı.

Ukrayina Yuqarı Şurası 240 halq vekiliniñ rey berüvinen "Simferopol" halqara ava alanına qırımtatar halqınıñ qaramanı, uçucı, eki defa Sovetler Birliginiñ Qaramanı Amet-Han Sultan adını berüv aqqında qarar qabul etti. Qararnıñ müellifi Halq Cebesi vekili A. Teteruk oldı. Yañı adnıñ berilmesi Amet-Han Sultannıñ hatırasını ebediyleştirmek, Ukrayina ükümetiniñ öz vatandaşları arasında tolerantlıqnı qaviyleştirmek içün yapqan areketlerini numayış etmek, qırımlılar arasında yekâne Sovetler Birliginiñ Qaramanı unvanınen eki defa taqdirlengen qaraman-cebeciniñ hatırasına sayğı köstermekten ibaret edi.

1995 s. Aqmescitte qırımtatar gençleriniñ I Qurultayı ötkerildi.

Qurultaynı ötkerüv devrinde gençler cemaat teşkilâtı — Qırırmtatar gençler merkezi teşkil etildi. Reis olaraq E.Bariyev saylandı. Areketniñ maqsadı gençlerni qırımtatar halqınıñ medeniyeti ve adetlerini kütleviyleştirüv ğayesi etrafında birleştirmekten ibaret edi.

2016 s. Yevrovideniye finalında Camala 534 ball toplap, ğalebe qazandı.

İsveçniñ paytahtı Stokgolmde ötkerilgen Yevrovideniye yır konkursınıñ finalında qırımtatar halqınıñ vekili Ukrayina yırcısı Camala (Susanna Camaladinova) qırımtatar halqınıñ sürgünine bağışlanğan "1944" yırınen galebe qazandı. Camala Yevrovideniye — 2016-nıñ eki mükâfatına: konkurs yırınıñ sözleri içün Eurostory Award 2016 ve halqara yır konkursı çerçivesinde taqdim etilgen Marcel Bezencon mükâfatına nail oldı.