Çiçeknıñ 6

1976 s. Özbekistanda, Samarqand şeerinde ressam, çölmekçi Rustem SKІBİN doğdı.

Ukrayina halq yaratıcılığınıñ namlı ustazı, "Mikelancelo" dekorativ-ameliy sanatı ustaları halqara fundatsiyasınıñ azası, "El Cheber" çölmekçilik ustahane-mektebiniñ teşkilâtçısı, Ukrayina ve çetelde qırımtatar medeniyetiniñ ambassadorı ve faal promouteri. Qırımtatar örnek ananeleri boyunca çalışaraq, öz şahsiy, çölmek üstünde polihrom yazuvı – "Quru Isar" üslübini yarattı. Mezkür üslüp Qırımnıñ/Ukrayinanıñ dünyaviy brendi olaraq tanıldı. 
2014-2024 ss, vaqtınca işğal etilgen Qırım Muhtar Cumhuriyetinden çıqqan soñ, Kiyev şeerinde yaşay ve icat ete. Eserleri Ukrayina, AB, Büyük Britaniya, AQŞ, Kanada ve diger memleketlerniñ 50-den ziyade müzey ve şahsiy kollektsiyalarında saqlanıp tutula. Ustanıñ çölmek (keramik) eserleri Qırımnıñ tamır halqı — qırımtatarlarınıñ canlı medeniyetiniñ aydın bir temsilidir. "Rustem Skıbin" çölmek brendi "Ukrayinanıñ 100 brendi" reytingine kirsetilgen.