Çiçeknıñ 29

1648 s., Sarı Suvlar yanında (şimdiki Dnepropetrovsk vilâyeti) uruş olıp keçti.

1648-ci s., Jovti Vodi (Sari Suvlar) yanında Bogdan Hmelnitskiyniñ yolbaşçılığında 5 biñge yaqın kazak ve qırımtatar murzası Tuğay beyniñ 20 biñge yaqın atlı askerleri Stefan Pototskiy ve Stefan Çernetskiyniñ reberligindeki leh ordusı üzerinde ğalebe qazandılar. Bu, Ukrayina halqınıñ Reç Pospolitayağa qarşı milliy azatlıq cenki devamında birindi büyük muarebesi edi. Tamam bu zaman Ukrayina devletçiligi ğayesi ğayrıdan canlandı.

1931 s., Qırımda, Kikineiz köyünde şairyırcı, milliy areketniñ azası
Edem TATAROV (29.04.1931–27.02.2014) dünyağa keldi.

1944 s., quralaynıñ 18-inde Özbekistannıñ Samarqand vilâyetine sürgün olundı. 1957 s. qırımtatar milliy areketine qoşuldı. 1986 s. başlap Novorossiysk qırımtatar teşebbüs gruppasınıñ faal iştirâkçisi. 1988 s. 19-cı Umumittifaq partkonferentsiyasına qırımtatar meselesiniñ çezilmegeni, muayyen bir alda olğanını yetkizmek maqsadınen gruppa terkibinde Moskvağa kete, yaqalanıp eki sutka devamında "Matrosskaya tişina"da tutula. 
1990 s. başında qorantasınen Qırımğa avdet ola. Muzıkağa qoyulğan ana tilinde şiirler yaza. 2011 s., 80 yıllığı munasebeti ile, qırımtatar tilinde "Edem Tatarov — qalbi yırlağan adam" kitabı neşir etile. Qırımda vefat etti.

1989 s. Qırımtatar milliy areketiniñ teşkilâtı (OKND) meydanğa ketirilgen.

1989 s., çeçek ayında teşebbüs gruppalarınıñ vekilleri Özbekistandaki Yangiyül şeerinde sabit azalığı, nizamnamesi ve aydın programması olğan Qırımtatar milliy areketiniñ teşkilâtını (OKND) tesis ettiler. Başlığı olaraq Mustafa Cemilev saylandı. Kommunizmge duşmanca baqqan OKND Ğarpnıñ destegini ala. OKND azaları Qırımdaki vaziyetni talil ete, qırımtatarlarnıñ aq-uquqlarını qorçalay, akimiyet provokatsiyalarını zararsızlaştıra, bazı yerlerde milletlerarası çatışmalarınıñ peyda oluv yolunı vaqtına kese edi. Amma esas meselerden biri — ğurbetlikten vatanğa qaytqanlarğa topraq ayırılması edi. Şimdiki Qurultay ve Meclis azalarınıñ çoqusı OKNDniñ sabıq azalarıdır.