Çiçeknıñ 27

1980 s., Özbekistanda, Navaiy şeerinde siyasetçi, oca,
siyasetşınas ve jurnalist Nariman CELÂLOV doğdı.

2007 s. Qurultay vekili ve Meclis azası. 2011–2014 ss. ilk qırımtatar ATR telekanalınıñ müellifi, muarriri ve yetekçi siyasiy programmalarnıñ diktorı. Qırımtatar halqı milliy meclisi reisiniñ muavini (2013) ve birinci muavini (2015). Qırım Rusiye tarafından işğal etilgen soñ, ukrayin ve halqara medialar içün qırımtatar halqınıñ yañı şaraitteki vaziyetini faal şekilde açıqlay, tefsir ete, şu sebepten işğal akimiyeti tarafından taqip oluna. Kiyevde ötkerilgen "Qırım platforması" sammitiniñ iştirakçısı (2021). 2021 s., ilk küz ayınıñ 4-de ağa-qardaş Asan ve Aziz Ahtemovlarnen beraber rusiye telükesizlik quvetleri tarafından yaqalanğan ve mahküm etilgen. 2022 s. ilk küz ayınıñ 21-de Qırımnıñ işğalcı Yuqarı Mahkemesi Nariman Celâl ve ağa-qardaş Asan ve Aziz Ahtemovlarğa qanunsız qarar çıqardı. Olarnı Anğara (Perevalnoye) gaz borusı diversiyasında qabaatlap, Nariman Celâlnı 17 yıl, Asan Ahtemovnı 15 yıl, Aziz Ahtemovnı 13 yıl müddetke azatlıqtan marum ettiler. 
2023 s., orta küz ayınıñ 2-den Sibirniñ Minusinsk ş-de, ciddiy tertipli koloniyada tutula. 2024 s. İlk yaz ayın 28-de Nariman Celâlovnı deñiştirüv yolunen Ukrayinağa qaytardılar.