Çiçeknıñ 20

1897 s. Qırımda, Aqmescit şeerinde oyuncı, baletmeyster,
rejisser, qırımtatar oyun mektebiniñ esasçısı
Üseyin BAKKAL (20.04.1897–20.10.1973) dünyağa keldi. 
Stalin terrorınıñ qurbanı. Büyük oyuncı, Aqmescitteki Qırımtatar devlet drama teatrınıñ artisti (1923).
Frankfurt-Maynde keçirilgen Bütündünya sanat ustaları festivaliniñ laureatı (Almaniya, 1927).

1934 s. qırımtatar oyun mektebiniñ temelini qoydı. 1937–1938 ss. — teatrınıñ baletmeysteri, Qırımtatar oyun ve yır ansambliniñ baş baletmeysteri. Rejissyor olaraq, "Arzı qız", "Altın beşik", "Bağçasaray közyaş çeşmesi", "Hoca Nasreddin"ve diger spektakllerni qoydı. Qırımtatar horeografiyasınıñ altın fonduna kirgen "Köyde bayram", "Çobanlar", "Sevimli şal", "İlk körüşüv", "Yüksek minare" süitalarnı sanalaştırdı.
1944 s. Qırımdan sürgün olundı. 1947 s. Leninabad şeeri A. Puşkin adına muzıka drama teatrınıñ baş baletmeysteri olaraq tayinlendi. 1948 s. "halq duşmanı" sıfatında yaqalandı ve 25 yıl müddetine azatlıqtan marum etildi. 1955 s. azat etildi ve reabilitatsiya olundı. Qırımtatar devlet türkü ve oyun "Qaytarma" ansambliniñ esasçılarından biri. Bu taqımda qoyulğan "Çoban oyunı", "Büyük horan", "Yengil horan" oyunları ve "Yüzük oyunı" folklor vokal-horeografik süitası qırımtatar horeografiya sanatınıñ hazinesine kirdiler. Tajikistanda, Çkalov şeerinde vefat etti.