Çiçeknıñ 13

1950 s., Özbekistanda, Taşkent şeerinde ressam
Rustem EMİNOV dünyağa keldi.

Taşkent politehnik institutınıñ ressamlıq-grafika bölüginiñ mezunı. Respublika ve umumittifaq sergileriniñ iştirakçısı. SSSR Ressamlar Birliginiñ (1998), Ukrayina Ressamlar Milliy Birliginiñ (2005) azası. 2007 s. QMC mukâfatınıñ laureatı unvanına nail ola. 2005-ci seneden Aqmescitte yaşay. Ressamnıñ yaratıcılığınıñ esas mevzusı — 1944-ci yılı qural ayı 18 künü qırımtatar halqınıñ mecburiy deportatsiyasınen bağlı vaqialar oldı. O, Qırımnıñ belli adamlarnıñ süretleri seriyasını yarata: türkşınas ve şair Bekir Çobanzadeniñ, publitsist Asan Sabri Ayvazovnıñ gruppa ve şahsiy portretlerini, "Deti deportatsii" ("Deportatsiya balaları") ve il. 400-den ziyade eserlerniñ müellifi. R. Eminovnıñ eserleri Taşkentteki (Özbekistan) Devlet sanat müzeyi ve bediy sergi ve panoram Direktsiyasınıñ, Aqmescitteki Qırımtatar sanat müzeyi ve Bağçasaraydaki İ. Gasprinskiy adında ev -müzeiniñ kollektsiyalarına kirsetilgen.

1909 s., Qırımda, Tuvaq köyünde, ressam
Amet USTAYEV (13.04.1909–04.07.1990) dünyağa keldi.

Bağçasaray ameliy sanat bediiy tehnikumında ressamlıq boyunca tasil alaraq, halq esnaflarını ögrendi. Oquvnı bitirgen soñ Qazahistanğa barıp, bir qaç yıl devamında kilim fabrikalarında kilim toqumacılığını ögrene. 1934 s. Qırımğa, tuvğan Tuvaq köyüne qayta. 1935 s. Aqmescitte yaşap, Qırım devlet drama teatrinde çalıştı. Ressamnıñ eñ meşur eseri olaraq, qırımtatar kedayı — Canğazı Şerfedinovnıñ portreti (1939) sayıla. Cenk, sürgünlik, ğurbetlikteki meşaqatlı yaşayış ressamnıñ icadını toqtata. Lâkin endi 1954 s. Ustayev bir sıra akvarel peyzajlarnı yarata, olarnıñ arasında "Utro" ("Saba"), "Gorod na rassvete" ("Şeer tañda"), "Granat v piale" ("Pialadaki nar") ve il. Ressamnıñ sekiz eseri Qırımtatar sanat müzeyinde saqlanıp turmaqta. Qazahistanda, Çimkent şeerinde vefat etti.