Çiçeknıñ 12
1916 s., Qırımda, Ay-Vasil köyünde (Yalta) Ekinci cian cenkiniñ iştirakçısı,
Poloniya Halq Gvardiyasınıñ kapitanı, Poloniya Cumhuriyetiniñ Qaramanı
Ümer ADAMANOV (12.04.1916–01.06.1943) doğdı.
1939 s. arman ayınıñ 5-de Qızıl ordu sıralarına mobilizatsiya olundı ve Stalingradda hızmet etti. 1941 s. yaralanıp Çenstohovdaki (Poloniya) arbiy esirler lagerine tüşe. 1942 s. lagerden qaçqan soñ, arbiy esirlerden partizan otryadını teşkil etkenlerniñ arasında edi. G.Kotovskiy adını taşığan otryad almanlarnen uruşlarda iştirak ete, böyle muarebelerniñ birinden soñ U.Adamanov komandirlikni öz üstüne ala. 1943 s., saban ayında, Adamanovnıñ otrâdı Halq Gvardiyasınıñ terkibine kirdi. Partizanlar arasında o, Mişka-tatar lağabı ile belli edi. Almanlarnen uruşlarda cesaretlik ve qorqubilmezliknen meşur oldı. 1943 s. işğalci akimiyeti Adamanovnıñ başı içün 100 biñ zlotıy işandırdı. 1943 s. ilk yaz ayınıñ 1-nde Yüzefuv köyündeki muarebede iştirak eterek, snayperniñ qurşunından elâk oldı. 1943 s. ilk qış ayınıñ 2-nde, ölüminden soñra, kapitan rutbesi ile 3-nci dereceli "Grünvald haçı"nen mukâfatlandı.
1939 s. Qırımda, Qoyaş köyünde şair, nesirci, milliy areketniñ iştirakçısı,
milliy eşyalarnıñ kollektsıyacısı,
hayrsever Pevat ZETİ (Pefat Aciredinov) doğdı.
Sürgünlikniñ birinci yılları ana-babası ve kiçik qardaşından marum oldı. "Lenin bayrağı" gazetasınıñ yardımınen edebiy tilni ögrenip, şiir yazıp başladı. 1975 s. Qırımğa avdet ola. 1980 s. "Lenin bayrağı" gazetasında ve "Yıldız" mecmuasında birinci şiirlerini bastırıp başlay. 1963 s. — milliy areketniñ iştirakçısı. "Dostluq" gazetasında çalıştı, qırımtatar milliy areketiniñ iştirakçıları, Qırımnıñ yoq olmaq telükesi altında bulunğan mahsus itibarğa lâyıq yerler aqqında malümatlarnı derc etti. P.Zetiniñ kitapları neşir etildi, şu cümleden, balalar içün şiirleri, eki cıltlıq "Qırımlarnıñ taqdiri" (2003, 2004), "Aqqıñdan vazgeçme" (2007). Qırımtatarnıñ eskiden qalğan maişet eşyalarını toplap, çoq yıllar devamında müzey ve kitaphanelerge bağışlay. Qarasuvbazarda yaşay.