Çiçeknıñ 1
1907 s. Qırımda, Toğay-Vaquf köyünde (şimdi ğayıp olğan) "Lenin bayrağı" gazetasınıñ ilk baş muarriri,
Özbekistan SSR Yuqarı Şurasınıñ VII-X çağuvlarınıñ deputatı
Abselâm İSLÂMOV (01.04.1907–01.12.1995) doğdı.
1921 s. açlıq devirinde öksüz qala, Aqmescit balalar evinde terbiyelene. "Köz aydın" balalar mecmuasınıñ, soñra – "Yaş leninciler" dergisiniñ muarriri olıp çalışa. 1935–1937 ss., "Qızıl Qırım" gazetası bölüginiñ müdiri ola. Ekinci cian cenki yıllarında Cenübiy-Ğarbiy cebesi 220-nci qırıcı aviatsiya diviziyası siyasiy bölüginiñ başlığı olaraq tayinlene. Özbekistanda yaşadı. 1957-nci s., qural ayınıñ 1-nden, Taşkentte, 25 yıl devamında A. İslâmovnıñ reberliginde çalışqan, ilk qırımtatar gazetası — "Lenin bayrağı" neşir etilip başlandı. İslâmovnıñ açıq ve samimiy kommunist tarafdarı itiqadlarına baqmadan, deportatsiya ve qırımatatar edebiyatı, medeniyeti, kimligi bile yasaqlanuvı şaraitinde, "Lenin bayrağı" gazetası qırımtatar tili ve edebiyatınıñ sаqlanuvına büyük isse qoşqan edi. 1985 s. Taşkent neşriyatında A. İslâmovnıñ "Yıllar ve yollar" hatırlavlar kitabı basıla. Taşkentte dünyanı terk etti.
1941 s. Qırımnıñ Büyük Qaralez köyünde sovet dissidenti, uquq qoruyıcı,
fizikajı alim, şair, qırımtatar milliy areketiniñ liderlerinden biri —
Yuriy OSMANOV (01.04.1941–07.11.1993) dünyağa keldi.
1944 s. ÖzSSR-niñ Ferğana şeerine sürgün etildi. M.Bauman adında Moskva tehnik Universitetini bitirip (1965), RSFSR-deki Yadro tedqiqatlarınıñ birleşme institutında ve Yüksek energiyalar institutında çalıştı. Bunıñen beraber о, Gasprinskiyniñ mirasını teren ögrene. Şiirler yaza. Soñra onıñ "Vatan sesi" şiiri ve "Men qabaatlayım" poeması repressiya, taqip etüvler içün sebepçi oldılar. 1960-cı ss. soñlarında qırımtatar halqı özüni cedvelge almasınıñ (samoperepis) teşkilâtçılarından ve faâl iştirakçılarından biri edi. "İftira mündericeli vesiqalarnı darqatuvı" içün 1968 s. — 2,5 yılğa ve 1982 s. — 3 yılğa aps etildi. 1987 s. kene de milliy areketke qayttı. SSSR Yuqarı Şurasınıñ qırımtatar halqı meseleleri eyetinde çalıştı (1989).
1990 s. Qırım vilâyet icra komiteti yanındaki Sürgün olunğan halqlarnıñ işleri boyunca devlet komitetiniñ reisi vazifesinde buluna. "Areket" gazetasını tesis etti (1991). 1993 s. boş ayınıñ 6-nda vahşiyce köteklendi. Ertesi künü yaralardan vefat etti. Aqmescit şeerinde defn olundı.