Sabanıñ 4

1905 s. Qırırmnıñ Ağaç-Eli köyünde şair, oca
Ğafar BULĞANAQLI (Eyupov) (04.03.1905–05.06.1987) doğdı.

Simferopol pedtehnikumını (1927) ve Dağıstan pedinstitutını bitirdi (1933). 30-cı s. Qırım ASSR Halq Tasili komissarlığında, 1941 s. Simferopol rayonındaki Büyük- Yanköy orta mektebinde direktor vazifesinde çalıştı. 1925 s. "Yaş quvet", "Yeñi dünya" gazetasında, "İleri", "Oquv işleri", "Yaş leninciler" mecmualarında maqaleleri basıldı. Ekinci cian cenki ve partizan areketiniñ iştirakçisi. SSSR Yazıcılar Birliginiñ azası. 1944 s. quralay ayınıñ 18-inde Qazaqıstan SSR-niñ Güryev şeerine sürgün etildi. Zavodda işçi olıp çalıştı. 1969–1986 ss. "Yırlar ve yıllar", "İnsan", "Çöller tañı" şiirler cıyıntığı neşir etildi. SSSR YB-niñ azası. 1987 s. ilk yaz ayınıñ 5-inde Qazaqıstannıñ Güryev ş. vefat etti.

1917 s. Aqmescitte qırımtatarlarnıñ mitingi olıp keçti.
Miting iştirakçileri çar ükümetinden, onıñ tarafından tayinlengen
Müsülman diniy idaresiniñ lâğu etilmesini talap etti.
Müftiyni umumhalq yolunen saylamaq qararını aldı.

Bunıñ içün teşkiliy komitet meydanğa ketirildi. Üç afta soñra umumhalq saylavı ötkerildi ve 1917 s. saban 24-te Butun Qırım müsülman syezdi çağırıldı. Onıñ vekilleri arasında qadınlar da bar edi. Syezd daimiy organ olaraq 50 adamdan ibaret Müsülman icra komitetini sayladı. Vaquf mülkü, diniy idare etüv, halq tasili, bücet ve stasistika, arbiy komitet işleri boyunca eyet tesis etildi. İcra komiteti reisi ve Tavriya müftiysi olaraq Numan Çelebicihan saylandı. Muvaqqat ükümet Müsülman icra komitetiniñ qırımtatar halqınıñ bütün meselelerini çezmek aqqını tanıdı.