Sabanıñ 3

1906 s. "Alem-i nisvan" ("Qadınlar dünyası") mecmuasınıñ ilk sanı dünya yüzü kördi.

1906–1908 ss. mecmua qırımtatar tilinde arap urufatınen "Terciman" gazetasına ilave olaraq bedava neşir etildi. 1908–1912 ss. o, müstaqil tarzda neşir etildi. Baş muariri — belli mütefekkir İsmail Gasprinskiyniñ qızı Şefiqa Gasprinskaya edi. "Alem-i nisvan" türk-müsülman dünyasında neşir etilgen ilk qadınlar mecmuası esaplana. 
Neşirniñ maqsadı — qırımtatar qadınlarınıñ medeniy seviyesini yükseltüvden ibaret edi. "Alem-i Nisvan" qadınlarnıñ şariattaki uquqınen bağlı diniy bilgilerni derc ete; gigiyenağa ait ilmiy yol-yoruqlar, ev işleri ve el işlerinen bağlı tevsiyeler bere edi. Mecmuada ilimge ve edebiyatqa bağışlanğan bölükler de bar edi. Bunıñnen beraber oquyıcılarğa meşur qadınlarnıñ tercime-i alı, diger memleketler aqqında ikayeler, bediiy edebiyat saifeleri tevsiye etile edi.

2011 s. Aqmescitte Qırım müsülmanları diniy idaresiniñ ve
Qırım MC Ükümetiniñ reberleri tantanalı tarzda Cuma Camisi inşaatınıñ temel taşını qoydılar.

Qırım müsülmanlarınıñ diniy idaresi 2004 s. itibaren CumaCami qurucılığı içün topraq ayırılmasını talap etmege başlağan, faqat Simferopol şeer şurası 2011 s. kiçik qış ayı 15-te Yalta soqağındaki 22-ci arsanıñ berilmesine qarar alğan edi. Cami qurucılığına ayırılğan yerde tantanalı tarzda qırımtatar, ukrayin ve rus tillerinde ecdatlarğa muracaat yazılğan kapsula qoyuldı.
2014 s. Qırımnıñ RF işğalinden soñ cami qurucılığı yarımadanıñ müsülman halqına tesir etmek içün muim alet olaraq qullanıldı, qurucılıqnıñ tezleştirilmesi ise basqıncı akimiyetniñ esas vazifesine çevirildi. 2023 s. ilk qış ayınıñ 9-ında caminiñ resmiy açıluvı ötkerildi.