Sabanıñ 29

1939 s. Qırımda, Çotqara köyünde şaire
Vasfiye QІPÇAQOVA (29.03.1939–01.11.2017) doğdı.

1944 s. quralay ayınıñ 18-inde Özbekistanğa sürgün etildi. Taşkent universitetini bitirdi. Rus, özbek, qırımtatar tillerinden ders berdi (1962–1993). 1988 s. Qırımğa, tuvğan köyü Çotqarağa avdet etti. Uzun yıllar devamında "İlham" edebiy birleşmesiniñ azası. "Ömürniñ içinden", "Balalar içün" ( 2004), "Yürek sırlarım" (2017) şiiriy cıyıntıqlarnıñ müellifi. Vatanğa sevgi, dostluq, insanlar arasındaki munasebetler — şaire icadınıñ esas mevzusını teşkil eteler. 2017 s. boş aynıñ 1-inde Bağçasarayda vefat etti.

2014 senesi Qırımtatar halqı Qurultayınıñ nevbetten tış sessiyası ötkerildi.

Qırımtatar halqınıñ Meclisi qırımtatarlarnıñ Rusie ükümetine "Qırım mustaqil Ukrayina devletiniñ ayrılmaz qısmıdır" degen qatiy fikrini bildirmek maqsadında Qurultaynı Bağçasarayda başlamağa qarar berdi. Qırımtatar halqınıñ Qurultayı "Qırımtatar halqı öz kelecegini belgilev aqqını tarihiy vatanı olğan Qırımda ayatqa keçirmesi aqqında" qararını qabul etti. Qararda qırımtatarlarnıñ "milliy ve territorial cumhuriyet teşkil etüv oğrunda siyasiy ve uquqiy areketlerni başlaması aqqında" söz yursetile. Qırımtatar halqınıñ Qurultayı şu cümleden BMT, Avropa Şurası, YS, OBSY, İslam işbirligi teşkilatını qırımtatar halqınıñ öz kelecegini milliy ve territorial cumhuriyet şeklinde belgilev aqqına qol tutmağa çağırdı.