Sabanıñ 26

1993 s. Qırım Yuqarı Şurası "Sürgünlik qurbanlarınıñ hatırası künü aqqında" qarar qabul etti.

Qırım YŞ-nıñ qararı SSSR Yuqarı Şurasınıñ 1989 s. boş aynıñ 14-teki "Mecburiy köçürilgen halqlarğa nisbeten yapılğan repressiya aktlarını qanundan tış ve cinaiy tanımaq, olarnıñ aqlarını temin etmek aqqında" deklaratsiyasına esaslanğan edi ve 1944 s. insan aqlarına qarşı yapılğan aktnı — Qırımdan qırımtatar, ermeni, bulğar, grek ve nemselerniñ sürgün etilgenini itibarğa aldı.

1979 s. Qırımnıñ Kezlev şeerinde qırımtatar tarihçısı, telecurnalist,
yazıcı Gülnara ABDULAYEVA doğdı.

2005 s. Vernadskiy adına Tavriya milliy üniversitetini tarih mutehassıslığı boyunca bitirdi. 2003–2014 ss. "Avdet" gazetasınıñ jurnalisti, tarih rubrikasını alıp bardı, "İndigo" yaşlar curnalınıñ baş muarriri. Qırım. Realii (Radio Svoboda) saytında "Tuğra" tarihiy videoblogınıñ müellifi ve alıp barıcısı. 2011 s. ATR telekanalında "Altın devir" tarihiy proyektiniñ müellifi ve alıp barıcısı.
"Şahin Giray" romanınıñ (2008), "Qırım hanlığınıñ altın devri" (2012), "Qırım hanlığı tarihında cenkler" (2013), "Qırırmtatarlar: etnogenezden devletçilikke" (2020), "25 meşur qırımtatar: Qırım hanlığından zemanemizge qadar" (2021) kitaplarınıñ müellifi. 2005 s. Ukrayina halqına hızmeti içün Ukrayina Yuqarı Şurasınıñ fahriy yarlığınen mükâfatlandı.