Sabanıñ 25
1611 s. İstanbulda (Тürkiye) Osmanlı imperiyasınıñ XVII asır devlet erbabı, coğrafiyacı, seyaatçı ve yazıcı
Evliya ÇELEBİ (25.03.1611–1679/1682) doğdı.
Türkiyeli seyaatçı ve saray ehli, Qırım hanınıñ yaqınlarından ve Osmanlı sultanınıñ vekili edi. Eserleriniñ belli bir qısmında, alelhusus on cıltlı "Seyaatname" eserinde Qırım mevzusı ayırı yer alğan. "Seyaatname" eserinde XVII asırdaki Osmanlı devletiniñ medeniyeti, yaşayış tarzı tasvirlene. Qırım aqqındaki ilk yazıları E.Çelebiniñ 1641–1642 ss. ziyareti, Bağçasaraynıñ qısqa tasviri ve han sarayğa yapqan teşrifine bağışlanğan. 1665–1666 ss. bütün Qırım boylap yapqan uzun kezintisinde, onıñ büyük şeerlerini, qalelerini ve qasabalarını, bunıñ kibi, Qırımnıñ tabiatını, ealısiniñ meşğuliyetini ve çizgilerini, ananelerini, urbasını, tış qiyafetini tasvirley. 1667 s. yapqan nevbetteki ziyaretinde E. Çelebi yañı han Adil Çoban Geraynıñ tahtqa oturması aqqında ikaye ete. Soñki X cıltta muellif Qırım aqqındaki malümatlarını umumlaştırmağa areket etti. Qararnen 1682 s. Qahirede vefat etti.
1916 s. Qırımıñ Qaşıq-Degirmen köyünde Ekinci cian cenkiniñ iştirakçısi,
Sovetler Birliginiñ Qaramanı, milliy areketimizniñ faal iştirakçisi
Uzeyır ABDURAMANOV (25.03.1916–19.01.1991) doğdı.
1941 s. Ekinci cian cenki cebelerinde cenkleşti — müendis batalönı bölügine komandanlıq yaptı. Qaramanlığı ve cesürligi içün 1944 s. qara qış ayınıñ 15-inde Sovetler Birliginiñ Qaramanı unvanınen taqdirlendi. Cenkten soñ qorantasınıñ artından Özbekistanğa sürgün etildi. 1950 ss. Milliy areketniñ faal iştirakçisi oldı. Toplaşuvlarda, aktsiyalarda ve narazılıq mitinglerinde iştirak etti. Halqımıznıñ vekili olaraq Moskvağa bardı, bunıñ neticesinde KGB-ğa çağırılıp, sorğu etildi. 1962 s. Navaiy şeerine köçti, uran zavodında çalıştı. 1991 s. qara qış ayınıñ 19-ında vefat etti.
2014 s. Qırımda Ukrayinanıñ soñki arbiy qısmı — ADK-niñ "Çerkassı" arbiy gemisi basıp alındı.
Bundan soñ Qırım Muhtar Cumhuriyeti ve Aqyar RF arbiy küçleri tarafından basıp alındı.
Qırımnıñ vaqtınca anneksiyası başlanğanda, saban 20 künü Rusiye arbiyleri Ukrayina arbiyleriniñ Rusiye tarafına keçmesini talap etken ultimatum ilan ettiler. Saban 21-de 2 zabit, 1 miçman ve 9 ekipac azası vazifesinden boşatılması aqqında ariza yazdı ve gemini terk etti. Geminiñ qalğan taqımı Rusiye arbiyleriniñ talabını becermekten vazgeçti ve Donuzlavdan çıqıp ketmege ıntıldı. Lakin areket muvafaqiyetsizliknen yekünlendi ve gemi leñger atmağa mecbur oldı. Bundan soñ gemi taqımı mudafağa keçe. Saban 23-de "Çerkassı" taqımı tekrar qamaçavnı bozmağa ıntıldı. Gemi çöktirilgen eki rus gemisi arasından keçmege areket ete. "Çerkassı" bunı yapmağa muvafaq ola, faqat Rusiye kateri oña yan taraftan darbe bere. Darbe neticesinde geminiñ burun qısmı saylıqqa otura. Saban 25-te aqşam Rusiye arbiyleri gemini basıp alalar. Ücüm eki Mİ-35 vertolötı ve üç hızlı kater iştirakinen yapıldı.