Sabanıñ 20

1939 s Qırımnıñ Büyük Ozenbaş köyünde çalğıcı, bestekâr, icracı
Enver QAMBUROV (20.03.1939–19.09.2017) doğdı.

1944 s. quralay ayınıñ 18-inde Özbekistanğa sürgün etildi. Konservatoriya yanındaki muzıka mektebiniñ kemane sınıfını muvafaqiyetli bitirdi. Amma, onıñ esas çalğı aleti truba oldı. 19 yaşında "Qaytarma" ansambliniñ birinci taqımına kirdi (1957). S.Erecepova, S.Çelebiyeva, F.Belâlov, E.Şerfedinov, İ.Bahşış, E.Topçı kibi belli bestekâr, yırcı ve çalğıcılarnen çalıştı. Sevimli eski halq yırlarınıñ bestekârı ve yırcısı edi. Qırırmtatar milliy areketi iştirakçisi. 1967 s. qırımtatar halqınıñ vekillerinden biri olaraq Moskvağa bardı.
E.Qamburov Qırımğa qytqan soñ, Kezlevde yaşadı. 2017 s. ilk küz ayınıñ 19-ında vefat etti. Bağçasaray rayonınıñ Manğuş köyünde defin etildi.

2014 s. Ukrayina Yuqarı Şurası qırımtatar halqını tamır halq,
Meclis ve Qurultaynı ise — onıñ vekâletli organı olaraq tanıdı.

Ukrayina Yuqarı Şurasınıñ 2014 s. saban 20-de qabul etken "Qırımtatarlarnıñ Ukrayina devleti terkibindeki aqlarınıñ temin etilmesi" aqqındaki qararı mücibi, qırımtatar halqı Ukrayinanıñ tamır halqı tanıldı ve olarnıñ aqları temin etildi. Bu qararnıñ qabul etilmesi içün 283 halq vekili rey berdi. Qararda Ukrayina qırımtatar halqını tamır halq olaraq ve Ukrayinadaki bütün milliy azlıqlarnıñ milliy, medeniy, til ve diniy hususiyetiniñ saqlanmasını ve inkişaf etmesini teminleycegi ve mustaqil ve suveren Ukrayina devleti terkibinde qırımtatar halqınıñ ayrılmaz aqqı olğan öz muqadderatını özü tayin etmesini saqlav ve yerine ketirilmesi teminlenecegi qayd etile. Ukrayina, qırımtatar halqı Meclisini, Qurultaynıñ icra organını qırımtatar halqınıñ aliy icra organı olaraq tanıy. "Ukrayinanıñ tamır halqları aqqında"ki Ukrayina Qanunı 2021 s. oraq 1-de qabul etildi.