Sabanıñ 17
1889 s. Qırımnıñ Autka qasabasında içtimaiy-siyasiy erbap,
"Milliy Fırqa" partiyasınıñ esasçılarından biri
Halil ÇAPÇAHÇI (17.03.1889-1931 soñ) doğdı. Stalin terrorınıñ qurbanı.
Tasili boyunca ekim, Şimaliy flotta arbiy ekim olaraq hızmet etti. "Milliy Fırqa" partiyasını teşkil etüvde faâl iştirak etti. 1917 s. Bütünqırım müsülman syezdinde Qırım Muvaqqat Müsülman İcra Komitetiniñ azası olaraq seçildi. Qırırmtatar halqınıñ I Qurultayı vekili. İcret etmege razı olmay ve Sovet devletiniñ uquq dairesinde çalışaraq, qırırmtatar halqınıñ aqlarını tiklemek içün küreşti.
Qırırm ASSR sağlıqnı saqlav halq komissarı vazifesinde çalıştı (1921–1928). 20-nci ss. soñunda H. Çapçhçı "Milliy Fırqa" işi boyunca yaqalana, milletçilikte qabaatlanıp, qurşun cezasına üküm etile. Apishanede bir yıl yatqan soñ olüm cezası 10 yıl mecburiy hizmet cezasınen deñiştirildi ve Belomor-Baltıq kanalı qurucılığına yollanıldı. Halil Çapçahçınıñ bundan soñki taqdiri belli degil.
1992 s. Kiyevde qırımtatr milliy areketi iştirakçileri tafafından teşkil etilgen "Kiyev-92"
umumhalq aktsiyası başlandı.
Aktsiya bir qaç kün devam etti. İştirakçiler ükümet reberleriniñ Meclis vekillerinen körüşmesini ve Ukrayina Yuqarı Şurasınıñ Qırımğa Ukrayina terkibinde milliy-territorial muhtariyet statusını bermek qararınıñ qabul etilmesini talap ettiler. Parlament qarşısındaki meydanda 50-den ziyade adam toplandı. Aktsiya iştirakçilerinen olğan körüşüvde, Ukrayina YŞ Reisiniñ muavini Vasiliy Durdinets Ukrayina YŞ qırımtatar halqınıñ milliy devletçiligini tiklev aqqındaki siyasiy arizanı qabul etmege azır olmağanını bildirdi. Bundan soñ "Berkut" qısımlarınıñ yüzlernen askerleri iştirakçilerge qarşı yaş aqıtqan gaz ve sopa qullandılar. Ertesi künü Mihaylov meydanında bir qaç biñ adamdan ibaret şeer sakinleriniñ mitingi olıp keçti ve anda qırımtatar halqınıñ öz milliy devletçiligini tiklev aqqınıñ tanılmasını talap etken rezolütsiya qabul etildi. Meclis reisi Mustafa Cemilev Ukrayina prezidenti L.Kravçukqa yapqan muracaatında şöyle dedi: "Saban 19-da Kiyev şeerinde qırımtatar halqı vekilleriniñ tınç nümayişine qarşı yapılğan qanlı ceza neticesinde Ukrayina ükümeti, şubesiz, Ukrayinadan ayrılmaq içün küreşeyatqan Qırım şovinistleriniñ alğışını qazandı, çünki Qırımda olarğa qarşı turğan esasiy teşkilatlı küç qırımtatar milliy areketidir. Biz Ukrayina ükümetinden, iç olmağanda öz faydasına büyük ihtiyatkârlıqnen iş körecegine ümüt beslegen edik".