Sabanıñ 11
1967 s. Özbekistan SSR-niñ Yangiyol şeerinde ressam
Seyran QURTCEMİL doğdı.
1990 s. Nizamiy adına Taşkent devlet pedagogika institutınıñ bediiy-grafika fakültetini tamamladı.
1991 s. cumhuriyet, halqara ve çet el sergilerinde iştirak etti. 1998 s. Özbekistan Ressamlar icadiy birleşmesiniñ azası. Belli işleri: "Yürgen adam", 2000; "Noyabr", 2008; "Sessizlik", 2009; "Köy peyzajı", 2013; "Oktâbr", 2014; "Küz", 2014; "Üyle vaqtı", 2017. Ressamnıñ eserleri Ukrayina, Özbekistan, Niderlandiya, Almaniya, İngiltere, Latviya, İsrail, Frenkistan, ABŞ kibi devletlerniñ bediiy galereyalarında ve şahsiy kollektsiyalarda saqlanmaqta. Aqmescitte yaşay.
1910 s. Qırımnıñ Qarasuvbazar şeerinde aktör, rejissör, dramaturg
Ğani MURAD (Muratov) (11.03.1910 – 2012) doğdı.
1929 s. Aqmescitteki Qırımtatar devlet drama teatrı studiyasına oqumağa kirdi. Baş rölleri: Goratsio ("Gamlet", V.Şekspir), Kassio ("Оtello", V.Şekspir), Şah Zair-han ("Şahname" Firdevsiy), Cihangir ("Namus" А.Şirvan-zade, kreyser kapitanı ("Optimistik facia", V. Vişnevskiy) ve başqalar. 1931 s. — Qırım radiosı rejissörı.
1944 s. quralay ayınıñ 18-inde Tacikistan SSR-niñ Leninabad şeerine sürgün etildi. Soñ Taşkentke köçti ve Hamza adına Teatrda baş rejissör yardımcısı olıp çalıştı. Ğ.Muradnıñ pyesaları "Yañı dünya" gazetasında ve "Yıldız" jurnalında basıdı, ikaye ve povestler cıyıntığı neşir etildi. Teatrımız tarihına bağışlanğan "Teatr sanatımıznıñ saifelerinden" (1990) kitbınıñ müellifi.
2014 s. Rusiye Federatsiyası tarafından işğal etilgen
Qırımda Qırım MC Yuqarı Şurasınıñ qapalı toplaşuvda Ukrayina qanunını ve
Anayasasını bozğan alda, Qırım MC-niñ ve Aqyarnıñ müstaqilligi aqqında Deklaratsiya qabul etti.
Vesiqa Qırım MC ve Aqyar şeerini mustaqil devlet — Qırım Cumhuriyeti dep ilan etti. Matbuat vekilleri Qırım Yuqarı Şurasınıñ toplaşuvına kirsetilmedi.
Vesiqa nizamnamesi mücibi, eger saban 16-da qararlaştırılğan referendum neticesine köre, Rusiyege qoşuluv aqqında qarar alınğanı taqdirde, Qırım "cumhuriyet şeklinde idare etilecek mustaqil ve suveren devlet ilan etilecek" edi. Vesiqa rusiye interventsiyası şaraitinde ve Qırım MC Yuqarı Şurasını basıp alğan silâlı küçler tazyıqı altında qabul etildi.
Ukrayina Anayasasınıñ qaba bozulmasına cevap olaraq Ukrayina Yuqarı Şurası 15.03.2014 s. "Qırım Muhtar Cumhuriyetiniñ vekâletini müddetinden evel toqtatuv aqqında" Qarar qabul etti.