Sabanıñ 1

1946 s. Özbekistanniñ Ferğana şeerinde ressam,
sanatşınas Mamut ÇYRLU doğdı.

Qırımtatar milliy galereyasınıñ (şimdi Qırımtatar milliy-tarihiy miras muzeyi) (1992) ve Qırımtatar ressamları birleşmesiniñ (1992) teşkilâtçılarından biri. Halq icadınıñ tedqiqatçısı, "Çatır-Dağ" icadiy birleşmesiniñ teşebbüsçisi. 
1966 s. qırımtatar kilimleri toqumacılığını yañıdan tiklev programmasını muvafaqiyetli amelge keçirdi. 1980 s. cumhuriyet, bütünittifaq, bütünukrayin, halqara ve çetel sergileri iştirakçisi. SSSR ressamlar birliginiñ azası (1988), Ukrayina milliy ressamları birligi (1989) ve Ukrayina halq ustaları birliginiñ (2004) azası. İsmail Gasprinskiy adına Qırım milliy cemiyetleri birleşmesi mükâfatınıñ laureatı (1999). Ukrayinada nam qazanğan ressam (2010). IV Bütünukrayin toquma malları sergisiniñ I mükafâtı saibi (2013).
Belli işleri: "Deportatsiya", 1994; "Laki", 1991; "Avdet. Marino", 1990; Triptih "Taqdir", 2010; "Grono", 1989; "Kötek", 2013; "Adalar", 2005. ve ilâhre.

2014 s. RF Devlet Duması V. Putinniñ Ukrayina topraqlarına
Rusiye ordusınıñ kirsetilmesi aqqındaki teklifine qol tuttı.

Bu "Rus birligi" partiyasınıñ reberi Sergey Aksönovnıñ Qırımda "tınçlıqnı ve tertipni teminlemek" ricasınen V. Putinge yapqan formal muracaatından soñ mümkün oldı.
Şu künü S. Aksönov Qırımdaki bütün silâlı qurulışlar oña boysunmaları kerekligi aqqındaki emirni imzaladı ve Qırım MC ve Aqyar Siâlı küçleriniñ Baş komandanı vazifesini öz üstüne aldı.
Bundan soñ yarımadanıñ bütün topraqlarında Ukrayina arbiy bazalarını qamaçavğa aluv, memuriy binalarnı basıp aluv, naqliye ağlarını ve başqa zarur strategik obyektlerni nezaret altına almaq içün kölemli küç qullanuv tedbirleri ötkerildi.