Kiçiknıñ 27

1918 s. Qırımda, Dereköyde, teatr aktrisası, Ukrayinada nam qazanğan artistka
Ayşe DİTTANOVA (27.02.1918–15.11.2015) dünyağa keldi.

1933 s. Aqmescit teatr tehnikumını bitirdi, Qırım drama teatriniñ truppasında hızmet etti. K. Götstsi "Turandot", "Bağçasaray çeşmesi" (A. Puşkin eseri boyunca), M.Görkiyniñ "Peçeller", Y.Bolatnıñ "Arzı qız", İ. Bahşişniñ "Adıñ çıqqance – canıñ çıqsın" pyesaları boyunca spektakllerde baş rollerni icra etti.
Tacikistanğa sürgün etildi, anda başqa artistlernen beraberlikte, uran topraqlarınıñ zenginleştirüv zavodında çalıştı, 1946 senesinden başlap, zavod yanında meydanğa ketirilgen ansamblde çalışqan edi. Qırımğa 1988 s. avdet oldı ve, birden, Qırımtatar drama teatriniñ ğayrıdan tiklenüv işine başladı. Bu teatrde o, 1990 senesinden başlap, 1996 senesinece hızmet etti. 1996 s. AQŞğa ketti, lâkin Qırımğa çoq seferler kelip ketken edi. 2014 s. Birleşken Milletler teşkilâtı ştab-kvatirasında ötkerilgen, qırımtatarlar sürgünliginiñ 70-yıllığına bağışlanğan hatıra tedbirinde iştirak etti. 2015 s. boş ay 15-te, AQŞda, Nyu-York şeerinde ebediyen köz yumdı.

1917 s. Qırım musulman inqilâbiy komiteti meydanğa ketirildi.

Mezkür Komitet bütün Qırım boyu umumhalq saylavlar teşkil etken edi. 1917 s. saban ay 25-nde, 1500 vekil ve 500 musafir teşrif buyurğan Bütünqırım musulman toplaşuvı ötkerildi. Bu toplaşuvda Noman Çelebicihan yolbaşçılığında olğan Qırım musulman icra komiteti saylandı. Şu Komitet tarafından Muvaqqat Ükümet bütün qırımtatarlarnıñ ihtiyaclarını taqdim etecek yekâne ve resmiy memuriy organ olğanı tasdiqlandı.

2014 s. rusiye arbiyleri Qırım Muhtar Cumhuriyeti Yuqarı Şurası ve Nazirler Şurasınıñ binalarını zapt ettiler.

2014 s. kiçik ay 26-dan 27-ge avuşqan gecesi Aqyardan kelgen, üstünde belgi nişanları taqılmağan arbiy forma kiygen, RF ava desantı qısımlarnıñ mahsus vazifeler becergen diversiya-keşfiy gruppası Aqmescitteki memuriyet binalarını zapt etti. O zaman Qırım akimiyetiniñ saytları çalışmadı, Aqsmecit merkezindeki cemaat naqliyesiniñ areketi toqtadı.
2014 s. kiçik ay 27-niñ saat 23.00-lerde rus arbiyleri "Belbek" ava limanını muasara ettiler. Bundan soñ, bir-qaç kün devamında, şeerlerniñ soqaqlarını ve yarımadanıñ müim yollarını rus işğalci askerler toldurdı.