Kiçiknıñ 26

2014 s. Aqmescitte Meclis taraftan Ukrayina territorial birdemligine qoltutuv köstergen
umummillet mitingi toplandı.

Qırım Parlamentiniñ yanında, Ukrayinanıñ birdemligine qoltutuv köstermek içün, bir qaç biñ qırımtatar ve ukrayinler toplaşqan edi. Keçirilgen mitingniñ baş maqsadı — şu künü Qırım Parlamentiniñ Qırımnı Ukrayinanıñ terkibinden çıqarmaq qararını tasdiqlamağa bermemek edi. Ukrayinağa qoltutqanlarına qarşı "Rus birligi" partiyasınıñ bir qaç biñ tarafdarları tura edi. Bu eki küç qarşı-qarşığa bir qaç saat devamında turdı. Neticede, onlarnen adamlar yaralandı, eki adam elâk oldı. Ukrayina tarafdarları Parlamentniñ binasına, ne ise, kirip oldı ve mezkür qararğa yol bermedi.

2020 s. Ukrayina prezident taraftan
"Qırım Muhtar Cumhuriyeti ve Aqyarnıñ işğaline narazılıq kösterüv Künü aqqında"
Qarar imzalandı.

Mezkür Qararda: "Vaqtınca işğal olunğan Qırım Muhtar Cumhuriyeti ve Aqyarda yaşağan vatandaşlarımıznıñ, Ukrayina birdemligi içün alıp barğan küreşte cesürligi ve qaramanlığına sayğı köstermek maqsadınen; Aqmescitte, 2014 s. kiçik ay 26 künü ötkerilgen, qırımtatarlar, ukrayinler ve başqa millet vekilleriniñ iştiragınen Ukrayina territorial birdemligine qoltutuv bildirgen mitingniñ yıllığı qayd etilüvi munasebetinen", Ukrayinada er yıl kiçik ay 26-sı Qırım Muhtar Cumhuriyeti ve Aqyarnıñ işğalge qarşılıq bildirgen künü dep, temin etile. Bu Qarar çıqmazdan evel, Qırımnıñ işğalge qarşılıq bildirüv künü tek bir kere, 2016 s., qayd etildi. Mezkür tarih Ukrayina Yuqarı Şurasınıñ 2016 s. kiçik ay 2-nde çıqqan, № 3807, «2016 s. hatıra künler ve yubileyler qayd olunması aqta» Qararğa binaen qayd olundı.