Kiçiknıñ 20

1928 s. Qırımda, Sadır-Bağay köyünde bala yazıcısı, şair
İbraim EŞREF dünyağa keldi (20.02.1928–26.07.1974).

Edebiyatqa sevgini oña yerli mektepte ocalıq yapqan babası aşladı. 1944 s. mayıs 18 künü Özbekistanğa sürgün etildi. Anda olğanda, özüniñ balalar içün masallar ve nazmiyetini derc etken edi. Öz icadınıñ eñ faal noqtasında soqurlaştı. 1970 s. "Vay, vay, vay" adlı şiirler cıyıntığını çıqardı. Ekinci, "Kök quşağı" adlı toplamı, 1980 s. şairniñ vefatından soñ basıldı. İbraim Eşrefniñ şiirleri ve masallarında birqaç nesil büyügendir. Şiirleri başqa tillerge tercime etilgen edi. 1974 s. oraq ayı 26 künü vefat etti.

1931 s., Qırımda, Uzuncı köyünde, qırımtatarlarnıñ aq-uquqlarına nisbeten kösterilgen lâqaydlıqqa narazılıq bildirip,
öz-özüni yaqqan qırımtatar cemaat erbabı,
Musa MAMUT (20.02.1931–28.06.1978) dünyağa keldi.

1944 s. quralay 18-de Mamutnıñ qorantasını Özbekistanğa sürgün ettiler. Anda traktorcı, soñ dülger ve tehnik olıp çalıştı. 1975 s. Qırımğa qayttı, Beş-Terek köyünde ev satın aldı. Qırımda, qorantasını "propiska" yapmaylar, işke almaylar. "Pasport  rejimini bozuv"da qabaatlap, oña ve qorantasına qarşı cinayet işini başlaylar. 1976 s. ilk yaz ayı 23-nde onı yaqalaylar, eki yıl müddetke umumiy rejim lagerine mahküm eteler. Refiqası Zekiye Abdullayevanı ise – şartlı olaraq eki yılğa mahküm eteler. 1978 s. ilk yaz ayınıñ 20-nde aynı qabaatlav ile olarğa qarşı yañı cinayet işini başlaylar. Bu qarar seslendirilgende, Musa Mamut hızmet hadimleriniñ qoluna sağ alda teslim olmaycağını ilân etti. 1978 s. ilk yaz ayı 23-te, sovet akimiyetiniñ zulumına ve qırımtatarlarnıñ aq-uquqlarına köstergen lâqaydlıqqa qarşı öz narazlığını bildirip, Musa Mamut öz-özüni yaqtı. 1978 s. ilk yaz ayınıñ 28-nde, Aqmescitte, ateşten yaralanuv neticesinde vefat etti. İlk yaz ayınıñ 30-nda köy mezarlığında defn etildi.

2014 s. — Qırım yarımadasınıñ Rusiye Federatsiyası tarafından işğal etilmesiniñ başlanuvı.

Şu künü yarımadanıñ topraqlarını zapt etmek maqsadınen ilk kere insan ve maddiy resurslar qullanıldı. 2014 s. kiçik ay 20-de, Soçi şeerinde kiçik ayınıñ 7-23 künleri ötkerilgen olimpiada vaqtında, deñiz akvatoriyasını qoruğan RF Arbiy Deñiz Flotunıñ gemileri, Novorossiysk yalısında üstlerine belgi nişanları taqılmağan RF ordusınıñ askerlerinen, Aqyarğa yol aldılar. Birazdan, şu "yeşil adamçıqlar"nı QMC ve Aqyarda, memuriyet binalarını em cenkâver tehnikanı zapt etüvde ve arbiy qısımlarnı muasara etüvde faydalandılar.