Kiçiknıñ 18

1906 s., Qırımda, Çotqara köyünde, qırımtatar milliy areketniñ iştirakçisi
Yağya QASIMOV (18.02.1906–1987) dünyağa keldi.

1939 s. başlap, Qırım ASSRniñ Adliyecilik halq komissarı. 1941 s., Qırım akimiyet hadimlerinen birlikte, Krasnodar ülkesine evakuatsiyağa ketti. 1944 s. Qazahistanğa sürgün etildi, anda devlet organlarda çalıştı ve bu işni Qırğızstanda devam etti. 60-ncı ss. qırımtatarlarnı Vatanğa qaytaruv milliy areketine qoşuldı. 1965 s. halqnıñ temsilcisi mandatınen KPSS Merkeziy Komitetiniñ azaları ve SSSRniñ ükümeti hadimlerinen olğan körüşüvlerde iştirak etti. 1971 s. Qırımğa qaytmağa tırıştı. Areketleri bir neticesiz olğan soñ, Novorossiyskke köçti. Anda 1987 s. bu dünyanı terk etti.

1937 s. Kökköz köyünde qırımtatar milliy areketiniñ iştirakçisi
Şefiqa KONSUL (18.02.1937–03.09.2021) dünyağa keldi.

1944 s. mayıs 18 künü Tacikistanğa sürgün etildi. Qırımtatar milliy areketiniñ belli veteranı Mustafa Konsulnıñ refiqası.1960-ncı senelerniñ başlarında, qocasınen beraber, qırımtatarlarnıñ Vatanğa qaytaruv ve Qırımda devletçilik ğayrıdan tiklev areketine qoşuldı. "Dostlarım — menim yırlarım" adlı yırlar toplamınıñ muellifi. Yırlamağa seve edi, muzıka tasili olmağanına baqmadan, türküler içün muzıka ve şiirler yazğan edi. Acayip ses saibi olğanı sebebinden, oña "milliy areketniñ bülbüli" dey ediler. Ğayet çoq masal, atalar sözleri ve aytımlarnı bile edi. 2021 s. ilk küz 3-nde, Aqmescitte, ebediy köz yumdi.