Kiçiknıñ 14

1931 s., Qırımda, Büyük Özenbaş köyünde, din erbabı, 1995–1999 ss. devamında
Qırım musulmanlarnıñ Müftisi olğan, Nuri MUSTAFAYEV (14.02.1931–28.03.2011) doğdı.

Qırımtatar halqınen beraberlikte 1944 s. mayıs 18 künü sürgünlikke oğratıldı. Andijan qurucılıq tehnikumınıñ mezunı. 1995 s. "Azret Ümer" camisiniñ imamı. 2011 s. saban ayınıñ 28 künü vefat etti. Aqmescitte defn etildi.

1901 s., Qırımda, Yeñi-Qale köyünde, şair, edebiyatşınas, tarihçı, medeniyet erbabı
Amdi GİRAYBAY (Abdulafat Lâtifov) (14.02.1901–13.09.1930) dünyağa keldi. Stalin rejiminiñ qurbanı.

Edebiyat tarihında qırımtatar şiiriy tiliniñ islâhatçısı tarzında belli, arap ve farsi alınmalardan vazgeçmek yolunda edi. Student yaşlar cemiyetiniñ tesisçisi (1921). Şairniñ eserleri vatanperverlik ve milletperverlik ğayelerini beyan ete, halqnıñ an’anelerini ve qırımtatar turmuşını aks ettireler. A. Giraybay yañı elifbeniñ üzerinde çalışqanlardan biri edi. 1927 senesiniñ soñunda milletçilik ve casuslıqta qabaatlanıp, yaqalandı ve qurşun cezasına mahküm etildi. 1930 s. ilk küz ayınıñ 13-nde, Moskvadaki Butırka apshanesinde ceza ükümi yerine ketirildi. 1991 s. reabilitatsiya etildi.