İlk qışnıñ 9

1917 s. Bağçasaraydaki Han sarayında qırımtatar halqınıñ I Qurultayı açıldı.

Bu vaqiağa qol tutmaq içün Ukrayina Merkeziy Radasınıñ, latviya teşkilâtlarınıñ, Qırımnıñ çeşit halqları ve teşkilâtlarınıñ vekilleri keldiler. Qurultay teneffüsnen on sekiz kün devamında toplandı. O, Müsülman icra komitetiniñ vekâletini öz boynuna aldı, ilk Anayasanı ve devlet timsalini (gimn, bayraq) qabul etti, Noman Çelebicihan başçılığındaki milliy ükümet — Direktoriyni teşkil etti, Qırım Halq Cümhüriyeti meydanğa ketirilgenini ilân etti. 1918 s. Qara qış ayınıñ soñunda bolşevik terrorı neticesinde cümhüriyet öz faaliyetini toqtattı.

1926 s. Qırımda, Aqmescit ş. oyuncı, baletmeyster
Remziye TARSİNOVA-BAQQAL (09.12.1926–07.04.2021) doğdı.

Ocalarından biri babası — horeograf, qırımtatar oyun mektebiniñ esasçısı Usein Baqqal edi. 1944 s. qorantası Tacikistanğa sürgün etildi.  1947–1960 ss. Leninabaddaki Puşkin adına muzıkalı-drama teatrında çalıştı. 1975 s. "Qaytarma" qırımtatar ansamblinde oyun programmalarını teşkil etmege başladı. "Altın turna" oyunını, "May" süitasını, "Aqşam toyda" vokalhoreografik süitasını, "Yekâne ailede" oyun kompozitsiyasını, "Bogdan qaytarması"nı, "Yavluq oyunı"nı sanağa azırladı. Tacikistan SSR halq artisti (1983). 1989 s. Qırımğa qayttı. Qırırmtatar teatrı ve "Qırım" ansambli içün oyunlar sanalaştırdı. Qırım devlet filarmoniyasınıñ Kezlev bölügi yanındaki "Qaytarma" ansambliniñ bediiy reberi ve baş baletmeysteri (1992–2016). "Omür oyunnen" kitabınıñ müellifi (2018). Ukrayinada nam qazanğan artist (2020). Qırımda vefat etti. Aqmescitte defin etildi.