İlk qışnıñ 5

1910 s. Qırımda, Simeiz qasabasında bestekâr, oca, Ekinci cian cenkiniñ iştirakçisi
Abibulla KAVRİ (05.12.1910–01.12.1943) doğdı.

Aqmescit muzıka oquv yurtunı bitirdi (1940). Cenkten evel Qırımtatar devlet drama teatrında orkestr recissyorı olıp çalıştı. Alman işğali devrinde Abdulla Dağcınıñ gizli teşkilâtına qoşuldı. "Zera" yırınıñ (halq sözleri), M. Süleymannıñ "Yaremge mektüp", Şamil Alâdinniñ "Kavaleristler yırı", hor içün qayta işlengen "Port-Artur" halq yırınıñ, "Kemane ve fortepiano içün" muzıkalı pyesanıñ muzıka müellifi. A. Kavriniñ "Altın beşik" spektakline İlyas Bahşışnen müellifdeşlikte yazğan muzka — onıñ eñ belli eserlerinden biridir. 1943 s. almanlar tarafından yaqalandı ve uzun devam etken işkencelerden soñ "Krasnıy" (Aqmescit civarında) sovhozında qurşunlandı.

1928 s. Qırımda, Eski Yurt köyünde qırımtatar milliy areketiniñ veteranı
Lütfi BEKİROV (05.12.1928–25.04.2022) doğdı.

1944 s. Özbekistanğa sürgün etildi. Studentlik yıllarında qırımtatar milliy areketine qoşuldı. Teşebbüsçi gruppalar, soqaq komitetleri faaliyetinde iştirak etti. L.Bekirovnıñ qorantası 1968 s. Sovet ükümeti Qırımda yaşamağa izin bergen 198 qırımtatar qorantasından biri edi. L. Bekirov öz itiqadı ve köçken vatandaşlarımızğa faal yardım etkeni içün üç kere mahkemege berildi. Qırımda vefat etti.

1935 s. Qırımda, Tüp-Kenegez köyünde ressam ve oca
Şevket DERVİŞEV (05.12.1935–02.07.2000) doğdı.

1944 s. qorantasınen beraber Özbekistanğa sürgün etildi. Qırımğa 1989 s. qayttı. Qırımtatar ressamları birleşmesiniñ azası (1993). Peyzajlarınıñ mevzuatı — Orta Asiya ve Qırım. Ayrı eserleri Qırımtatar sanat muzeyinde (Aqmescit) saqlanmaqta. Belli işleri: "Kanal qurucılarınıñ sabası" (1985), "Evge qaytuv yolu" (1992), "Kilsenen peyzaj" (1994), "Yalıñızlıq", "Dost" (1996), "Sivaşta saba" (2000). Aqmescitte (1997) ve Canköyde (1998–1999) şahsiy sergileri teşkil etildi. Qırımda vefat etti.