İlk qışnıñ 27

1954 s. Özbekistannıñ Samarqand ş. faal cemaatçı, SSSR devriniñ siyasiy mabusı Sinaver QADIROV doğdı.
Qırımtatar halqı Meclisiniñ azası (1991–2013). II-V çağıruv Qurultay vekili.

1984–1985 ss. "Qasevet" adlı gizli qırımtatar mecmuasını çıqarmaq içün faal iştirak etti. Bu mecmua Özbekistan SSR-de ve Krasnodar ülkesinde gizli darqatıla edi, bu sebepten 1985 s. ilk qış ayınıñ 12-sinde S. Qadırov Reşat Ablayevnen beraber apiske alındı. Ceza müddetini Yaqutıstanda ödedi. 1991–2013 ss. qırımtatar halqı Meclisiniñ erkyanına kirdi. Qurultaynıñ II, III, IV ve V çağıruv vekili oldı, Merkeziy saylav eyetiniñ reisi etip saylandı. 2015 s. qara qış ayında Ukrayinanıñ qıta qısmına keçüvde Rusiye sıñırcıları tarafından yaqalandı. İşğalci akimiyetniñ "mahkeme" qararına köre o, Qırımnı qaytmamaq şartınen bütünley terk etmesi kerek edi.

2014 s. Ukrayina RNBO qararına köre Ukrayinanıñ
demiryol ve avtomobil naqliyesine Qırımğa adam taşuv yasaqlandı.

Qırım yonelişindeki soñki stantsiyalar Novoalekseyevka qasabası ve Herson şeeri qaldı. Qıtanen yarımada arasında demiryol vastasınen yuk taşuv toqtatıldı. Bundan da ğayrı, Ukrtransinspektsiya naqliyecilerden ve avtostantsiya hadimlerinden 2014 s. ilk qış ayınıñ 26-sından itibaren bilet satuv ve Ukrayinanıñ qıta qısmını Rusiye işğali altında bulunğan Qırımnen bağlağan yonelişte avtobuslarnen adam taşımanıñ toqtatılmasını talap etti.