İlk qışnıñ 25

Rizdvo Hrıstove — İsa peyğamberniñ doğğan künü.

1926 s. Qırımda, Qapıshor köyünde bestekâr, hor dirijyorı, oca, cemaat erbabı
Edem NALBANDOV (25.12.1926–22.05.1999) doğdı.

Sürgünlikte qorantası Mariy ASSR-ge tüşti. Taşkent konservatoriyasını bitirdi (1962). 1964 s. — "Qaytarma" ansambliniñ reberi. Özbekistan bestekârları birligi yanında onıñ teşebbüsinen teşkil etilgen qırımtatar muzıkası sektsiyasına yolbaşçılıq yaptı. 1993 s. Qırımğa qayttı. Y. Bolatnıñ "Dubaralı toy" komediyasınıñ muzıka müellifi (1992). İcadında hor janrı, şu cümleden qırımtatar vocal folklorındaki çoq seslik ayrıca yer aldı, hornen icra etmek içün "Aynenni", "Ziyafet yırı", "Dağlar", "Yar bulamadım", "Mecbur oldım" kibi yırlar azırladı. Muzıkadan "Bügün aynıñ on dörtü" ilmiy-tedqiqat işiniñ (Taşkent, 1984 s.), balalar içün "Muzıkada basamaçıqlar" oquv qullanmasınıñ, bir sıra muzıkalı cıyıntıqlarnıñ müellifi. İlyas Bahşınen müellifdeşlikte qırımtatar halq yırları cıyıntığını neşir ettirdi (1970). 1996 s. Aqmescitte tekrar neşir etilgen bu cıyıntıqqa 384 yır metini kirsetilgen. Aqmescitte vefat etti.

1930 s. Qırımnıñ Beşüy köyünde Ekinci cian cenkiniñ partizan areketi iştirakçisi
Sundus BADRAKOVA doğdı.

Babasınıñ cebede elâk olması ve eki ağasınıñ partizanlarnen bağı olğanı içün atıp öldürimesinden soñ, anasınen beraber partizanlarğa yardım etmege başlaylar. Daa soñra tuvğan köyü Beşüyniñ yaqıp yoq etilgeni sebebinden, anasınen beraber Bağçasaray partizan areketine qoşulalar, 1943 s. boş ayından 1944 s. çiçek ayına qadar cenkleşeler. 1944 s. quralay ayınıñ 18-inde S. Badrakova Qırımdan sürgün etile. Partizan areketinde iştirak etkenini, bir sıra orden ve medallernen mükâfatlanğanını tasdiqlağan vesiqanı o, Sovetler Birliginiñ dağılması ve Ukrayinanıñ mustaqil devlet ilân etilmesinden soñ almağa muvafaq oldı.

1937 s. Qırımda, Aluşta şeerinde milliy areket iştirakçisi
Ali TRASİNOV (25.12.1937–21.11.1969) doğdı.

1944 s. Özbekistanğa sürgün etildi. 1960-ıncı ss. başında milliy areketke qoşuldı. 1964 s. A. Trasinov yolbaşçılığındaki gençler gruppası mürekkep vazifelerni becere, qırımtatarlar toplu yaşağan yerlerni ziyaret ete, Moskvağa bara edi. A. Trasinov qırımtatarlarnıñ Çırçıqta ötkerilgen ve akimiyet tarafından şefqatsızlarca bastırılğan narazılıq mitinginde iştirak etti (1968 s.). Mitingde A.Trasinovnıñ başına uralar, soñ 15 kün devamında tibbiy yardım kösterilmeden, apishane kamerasında tutalar. Bu vaqialardan bir sene keçken soñ devamlı hastalıq neticesinde Taşkentte vefat etti.