İlk qışnıñ 24

1915 s. Qırımnıñ Partenit qasabasında oca, Ekinci cian cenkiniñ iştirakçisi, Sovetler Birliginiñ Qaramanı (1943)
Teyfuq ABDUL (24.12.1915–18.03.1945) doğdı.

1940 s. ilk yaz ayında arbiy hızmetke çağırıldı, subaylar arbiy mektebinde oqudı. 1941 s. ilk yaz ayında cebege ketti. Sovetler Birliginiñ Qaramanı, I ve II dereceli Cenkâver Qızıl Yıldız ordeninen mükâfatlandı. Neybrüken şeeri içün alıp barılğan cenkte razvedkacılar gruppasında mahsus vazifeni becergende ağır yaralandı ve elâk oldı. Cesedi Lvov şeerine ketirildi ve arbiy izzet-itiramnen Şan-şüret Bayırında defin etildi. Partenit qasabasında T. Abdulğa eykel qoyuldı. Aqmescitte qaramannıñ şerefine soqaqlardan birine onıñ adı berildi. Qırımtatar tilinde onıñ hatırasına bağışlanğan "Teufuq batır" yırı yazıldı.

1923 s. Qırımda, Küçükköyde yırcı, artist, bestekâr ve oca
Osman ASANOV (24.12.1923–11.2005) doğdı.

1939–1941 ss. Aqmescit muzıka oquv yurtunda oqudı. 1944 s. quralay ayınıñ 18-inde qorantasınen beraber Özbekistanğa sürgün etildi. 1955 s. Namanganda qırımtatar ansamblini teşkil etti. 1957 s. — "Qaytarma" ansambliniñ vokalisti ve kemanecisi. 1964–1991 ss. Ferğane muzıka mektebinde ocalıq yaptı, "Horan" ansamblini teşkil etti. 1991 s. Qırımğa qayttı. Gastrollerde, televideniyede yırladı. A. Asanovnıñ repertuarında qırımtatar, ukrayin, rus ve özbek halq yırları bar edi. Bestekâr olaraq belli. O, "Gülcian", "Navrez türküsi", "Yalta tangosı" kibi yırlarğa muzıka yazdı. Ukrayina halq artisti (1999). Aqmescitte vefat etti.