İlk qışnıñ 22

1953 s. Özbekistanda teatr ve kino aktyorı, yırcı, yazıcı, kulinar
Dilâver SETTAROV doğdı.

M. Aşrafiy adına Taşkent devlet koservatoriyasını bitirdi. Yedi sene opera solisti olıp çalıştı. 1989 s. Qırımğa qayttı. Qırımtatar akademik muzıkalı-drama teatrı teşkil etilgen künden başlap, onıñ aktyorı. Ukrayinada nam qazanğan artist (1993 г.). 60-dan ziyade röllerni icra etti. Seyirciler onı "Arşın mal alan", "Dubaralı toy", "Geceler hayır", "Hırsızlanğan kelin" spektakllerindeki ve "Тatar triptihı", "Bogdan-Zinoviy Hmelnitskiy" filimlerindeki obrazlardan tanıylar.

1923 s. Qırımda, Yalta civarındaki Dereköy köyünde Ekinci cian cenkiniñ ve milliy areketniñ iştirakçisi
Mustafa KONSUL (22.12.1923–31.07.1993) doğdı.

Mektepni bitirgen soñ arbiy hızmetke çağırıldı. Aqyar mudafaasında iştiraketti, ağır yaralandı. Sürgün etilgen qorantasını Samarqandda taptı. 1963–1964 ss. milliy areketke qoşuldı, Samarqanddaki teşebbüsçi gruppanıñ faal iştirakçilerinden biri oldı. Onıñ safdaşı ve fikirdeşi — ömür arqadaşı Şefiqa hanım edi. М. Konsul milliy areket vesiqalarını azırlay, areketniñ ihtiyacları içün aqça cıyuvğa reberlik yapa, vatandaşları arasında qırımtatar tili ve edebiyatı, tarihı, medeniyetinen bağlı maqaleler derc etilgen "Miras" halq gazetasını darqata edi. 
1968 s. yazda qırımtatar halqınıñ dünya cemaatçılığına yapqan Muracaatını imzalay. 1970 ss. diger areket vekillerinen milliy areketniñ Kassatsion arizasını azırlav işinde iştirak etti.
1989 s. Qırımğa qayttı. 1991 s. qırımtatar halqınıñ II Qurultayına vekil etip saylandı. Aqmescitte vefat etti.