İlk qışnıñ 20

1907 s. Qırımda, Büyük-Özenbaş köyünde ihtiolog-alim, parazitolog
Seytumer OSMANOV (20.12.1907–01.2008) doğdı.

İlmiy faaliyetini 1934 senesi A.İ.Gertsen adına Leningrad pedagogika institutınıñ ayvanatşınaslıq bölüginde başladı. 1938 senesi "Qara deñiz balıqlarınıñ parazit faunası" mevzusında biologiya ilimleri namzeti oldı. Ekinci cian cenki devrinde Qırım partizan otryadında savaştı (1943–1944).
1944 s. quralay ayında Özbekistanğa sürgün etildi. 1961 s. S.Osmanov reberliginde Harezim ve Qaraqalpaq ASSR-deki bütün suv havzaları ogrenildi ve pasportlaştırıldı, elde etilgen malümatlar "Amuderya etekleriniñ havuzları" kitabında derc etildi. Aral deñizi suv havzasına tedqiqat ekspeditsiyalarını teşkil etti, 150-den ziyade ilmiy işlerniñ müellifi. 1969 s. doktorlıq dissertatsiyasını qorçaladı. Bu ilmiy işi esasında "Özbekistannıñ parazit balıqları" kitabı neşir etildi. 1966 s. orta küz ayınıñ 1-inde ÖzSSR-niñ FAK Prezidiumı yanındaki zoologiya problemaları ilmiy keñeşiniñ reisi etip tayinlendi. Özbekistanda, Qaraqalpaqıstanda nam qazanğan ilim erbabı. S. Ocmanovnıñ şerefine bir sıra ayvanat dünyasınıñ çeşitleri onıñ adınen adlandırıldı. S. Osmanovnıñ 100 yıllığı munasebetinen Vatanında "100 yılğa musaviy yol" (2007) hatıralar kitabı neşir etildi. Müellif bu kitapnı 2002 s. yazıp bitirgen edi. Taşkentte vefat etti.