İlk qışnıñ 15

1992 s. Qırımda Petrovtsı köyünde rejissyor, stsenariyci, aktyor,
kinotenqitçilerniñ 2019 s. "Kinokolo" mükâfatınıñ laureatı (eñ yahşı rejissyor ve eñ yahşı film içün)
Nariman ALİYEV doğdı.

"Qırım tarihleri" trilogiyasınıñ qısımları esaplanğan üç qısqa metrajlı "Tañda qaytmaq", "Seni sevem" ve "Sensiz"filmleriniñ rejissyorı. 2017 s. Ukrayina kinoakademiyasınıñ azası. 2019 s. Avropa kinoakademiyasınıñ aazası. N. Aliyevniñ ilk tolu metrajlı "Evge" filmi (2019) 72-nci Kann halqara kinofestivaliniñ "Mahsus baqış" konkurs programmasına seçilgen edi. Filmdeki baş rölni aktyor ve rejissyor Ahtem Seitablayev oynadı.
2019 s. kinofilm Odessa kinofestivalinde "Altın Dük" baş mükâfatına, Budapeşt kinofestivaliniñ gran-prisine ve Halqara Bosfor kinofestivalinde eñ yahşı ecnebiy film mükâfatına nail oldı. Film Ukrayinada "Оskar" mükâfatına namzet olaraq seçildi.

1905 s. Qırımnıñ Sadır-Boğay köyünde edebiyatşınasalim, oca
Alim FETİSLÂMOV doğdı (15.12.1905–09.11.1967).

Qırımtatar tili ve edebiyatı fakültetiniñ ocası. 30-ıncı senelerniñ eñ mahsuldar müelliflerinden biri: folklornı, til ve edebiyat tarihını ogrendi, ikâyeleri ve taqrizleri neşir etildi. Birincilerden olıp, bügünge qadar özüniñ ilmiy qıymetini coymağan "Çorabatır" ve "Edige" tarihiy eposlarını, Toğaybey aqqındaki poemanı, Alim ve Arzı qız aqqındaki efsanelerni teren talil etti.
1939 s. "Zemane qırımtatar poeziyası" mevzusında filologiya ilimleri namzedi dissertatsiyasını qorçaladı. Qırımtatar folklorını tedqiq etti, halq arasında belli olğan eposlarğa bağışlanğan "Edige batır aqqında", "Çora-batır aqqında" kibi maqaleleri neşir etildi.
1940 s. YB-niñ azası. Sürgün etilgen soñ, 1950 s. Qırğızıstannıñ Calal-Abad şeerindeki pedinstitutta oca, 1965 s. Oş pedagogika institutında dotsent, rus tili ve edebiyatı kafedrasınıñ müdiri vazifesinde çalıştı. Oş şeerinde (Qırğızıstan) vefat etti.

1956 s. USSR Nazirler Şurasınıñ "Evelde Qırım vilayetinde yaşağan, mahsus sürgün yerlerinden qaytayatqan tatarlarnı,
nemselernı, greklerni, bulğarlarnı, ermenilerni ve başqa şahıslarnı yerleştirüv aqqında"
№ 1501-050 qararı qabul etilgen edi.

Qarar sürgün etilgen halqlarğa Qırımğa qaytmaqnı, bunıñ kibi Herson, Zaporojye, Nikolayev ve Odessa vilâyetlerine yerleşmekni yasaqlay edi. Lâkin o, SSSRniñ başqa yerlerine yerleşmege izin bere edi, faqat böyle imkândan sürgün etilgenlerniñ pek az qısmı faydalanması mümkün edi.