İlk qışnıñ 14
1895 s. Rusiyeniñ Astrahan şeerinde aktrisa
Sara (Sarra) BAYKİNA (14.12.1895–1972) doğdı.
Sana faaliyetini 1912 s. Astrahan tatar teatrı truppasında başladı. 1922 s. Qazandaki Birinci nümüneviy tatar teatrında, 1928–1929 ss. — Tatar akademik teatrında çalıştı. Bakuda, Uralda, Orta Asiyada gastrollerde oldı. 1923 s. Qırımğa tedaviylenmege keldi ve yañı açılğan Qırımtatar devlet drama teatrına daimiy çalışmağa davet etildi, repertuardaki baş rollerni icra etti. 1940 s. RSFSR-da nam qazanğan artist unvanı berildi. Qırımda 1941 s. qadar çalıştı. 1944 s. quralay ayında teatrınıñ hadimleri ve aktyorlarınen beraber Özbekistanğa sürgün etildi.1944–1956 ss. Andicanda özbek muzıkalı-drama teatrında çalıştı. Soñra Astrahanğa köçti, anda vefat etti.
1944 s. RSFSR Yuqarı Şurasınıñ Prezidiumı
Qırımdaki rayon ve rayon merkezleriniñ adını
deñiştirüv aqqındaki fermannı imzaladı.
Qararnı qırımtatarlar sürgün etilmesinden yarım yıl keçken soñ qabul ettiler. Ekseriyet toponimler qırımtatar asıllı edi.11 rayon ve rayon merkeziniñ adı deñiştirildi. Meselâ, Aq-Meçit rayonı – Çernomorskiy, Aq-Şeyh rayonı — Razdolnıy, Seitler — Nijnegorskiy, Büyük-Onlar — Oktâbrskiy oldı. Deñişmeler aqqındaki nevbetteki qararnı 1945 s. aldılar. Bu sefer köy şuralarınıñ ve rayon merkezleriniñ adlarını deñiştirdiler. Qırım ASSR yerine Qırım vilayetini teşkil ettiler.
1964 s. Özbekistannıñ Bulunğur ş. siyasetçi,
Qırımtatar Milliy Meclisi reisiniñ müavini (2008 s.)
Ahtem ÇİYGÖZ doğdı.
Ana Vatanı Qırımğa 1989 s. qayttı. 2002 s. Bağçasaray regional meclisiniñ reisi, çoq keçmeden Qırımtatar Milliy Meclisiniñ azası etip saylandı. 2002–2010 s. Ukrayina Prezidenti yanındaki qırımtatar halqı vekilleri Keñeşiniñ azası. 2008 s. A. Çiygöz Qırımtatar Halqı Meclisi reisiniñ muavini etip saylandı. 2015 s. qara qış ayınıñ 29-ında Rusiye işğalci ükümetiniñ silâlı küçleri vekilleri onı "kütleviy tertipsizlik teşkil etüv"de qabaatlap, yaqalaylar. 2017 s. ilk küz ayınıñ 11-inde anneksiya etilgen Qırımniñ Yuqarı mahkemesi A. Çiygözni 8 sene qattı rejim koloniyasına üküm etti. Orta küz ayınıñ 25-inde daa bir qırımtatar siyasiy mabusı İlmi Umerovnen beraber Türkiyege teslim etildi ve apis cezasından azat etildi. 2019 s. Ukrayina Yuqarı Şurasınıñ vekili etip saylandı.